കുറച്ചുകാലം മുമ്പ് തമിഴില്‍ ഒരു സിനിമയിറങ്ങി - ‘തമിഴ് പടം’ എന്നായിരുന്നു ചിത്രത്തിന് പേര്. തമിഴകത്തെ നിലവിലുള്ള സിനിമാ സമ്പ്രദായത്തെ കളിയാക്കുകയും വിമര്‍ശിക്കുകയും ചെയ്യുന്ന ഒരു സ്പൂഫ് ആയിരുന്നു ആ ചിത്രം. അങ്ങനെയുള്ള ചിത്രങ്ങള്‍ക്ക് മലയാളത്തിലും വലിയ സാധ്യതയുണ്ടെന്ന് അന്ന് തോന്നിയിരുന്നു. ഇപ്പോഴിതാ, അത്തരമൊരു പരീക്ഷണം എത്തിയിരിക്കുന്നു - ചിറകൊടിഞ്ഞ കിനാവുകള്‍.
നല്ല സിനിമകള്‍ മാത്രം നല്‍കുന്ന ‘മാജിക് ഫ്രെയിംസ്’ എന്ന ബാനറില്‍ നിന്നാണ് ഈ സിനിമ ലഭിക്കുന്നത്. നവാഗതനായ സന്തോഷ് വിശ്വനാഥ് സംവിധാനം ചെയ്തിരിക്കുന്ന സിനിമയില്‍ കുഞ്ചാക്കോ ബോബനും റിമ കല്ലിങ്കലുമാണ് ജോഡി. അഴകിയരാവണനില്‍ ശ്രീനിവാസന്‍റെ പ്രശസ്തനായ നോവലിസ്റ്റ് അംബുജാക്ഷന്‍ പറയുന്ന ആ അതിപ്രശസ്തമായ കഥയാണ് ഈ സിനിമയ്ക്ക് ഹേതുവായതെന്നത് ഏറ്റവും കൌതുകമുണര്‍ത്തുന്ന വസ്തുത.
