കേസുമായി മുന്നോട്ട് പോകുമെന്ന് എം.ടി. വ്യക്തമാക്കുന്നു. കേസ് നടക്കട്ടെയെന്നാണ് എംടി മനോരമ ന്യൂസിനോട് വ്യക്തമാക്കിയത്. അതേസമയം അവസാന മണിക്കൂറുകളിലും അനുരജ്ഞന ശ്രമവുമായി സംവിധായകന്‍ ശ്രീകുമാര്‍ മേനോനും രംഗത്തുണ്ട്. എം ടിയുമായി സംസാരിച്ചുവെന്നും ചിത്രം ഉടൻ സാധ്യമാകുമെന്നുമെല്ലാം ശ്രീകുമാർ മേനോൻ വ്യക്തമാക്കിയിരുന്നു. എന്നാൽ, ഇതെല്ലാം നുണയായിരുന്നുവെന്നാണ് ഇപ്പോൾ എം ടിയുടെ വാക്കുകളിൽ നിന്നു തന്നെ വ്യക്തമാകുന്നത്.
രണ്ടാംമൂഴം സിനിമ രൂപത്തില്‍ അടുത്തൊന്നും പുറത്തുവരില്ലെന്നാണ് സൂചന. കരാര്‍ കാലാവധി അവസാനിച്ചതിനാല്‍ തിരക്കഥ തിരികെ ആവശ്യപ്പെട്ട് കഴിഞ്ഞ പത്തിനാണ് എം.ടി കോടതിയെ സമീപിച്ചത്. തിരക്കഥ സിനിമയാക്കുന്നതില്‍ നിന്ന് സംവിധായകന്‍ ശ്രീകുമാര്‍ മേനോനെയും നിര്‍മാണ കമ്പനിയായ എയര്‍ ആന്‍ഡ‍് എര്‍ത്ത് ഫിലിംസിനെയും താല്‍കാലികമായി കോടതി വിലക്കുകയും ചെയ്തിരുന്നു.
