സൂര്യച്ചിത്രം - ‘എസ്കിമോ കാതല്‍’ - ഒരു റൊമാന്‍റിക് കോമഡി!
വ്യാഴം, 26 സെപ്‌റ്റംബര്‍ 2013 (21:22 IST)
PRO
സൂര്യ അഭിനയിക്കുന്ന പുതിയ തമിഴ് സിനിമ ഒരു റൊമാന്‍റിക് കോമഡിയായിരിക്കും. ‘സൂദ് കവ്വും’ സംവിധാനം ചെയ്ത നളന്‍ കുമാരസ്വാമിയാണ് ഈ സിനിമ ഒരുക്കുന്നത്. ചിത്രത്തിന് ‘എസ്കിമോ കാതല്‍’ എന്ന് പേരിട്ടതായാണ് റിപ്പോര്‍ട്ട്.
നളന്‍ കുമാരസ്വാമി എഴുതിയ ഒരു വണ്‍‌ലൈന്‍ തിരക്കഥ വായിച്ച സൂര്യ ആ പ്രൊജക്ടിന് അനുമതി നല്‍കുകയായിരുന്നു. സൂദ് കവ്വും ഒരു ബ്ലാക്ക് ഹ്യൂമര്‍ ഫിലിം ആയിരുന്നെങ്കില്‍ എസ്കിമോ കാതല്‍ പൂര്‍ണമായും ഒരു റൊമാന്‍റിക് കോമഡിയായിരിക്കും.
തിരുകുമരന്‍ എന്‍റര്‍ടെയ്ന്‍‌മെന്‍റ് നിര്‍മ്മിക്കുന്ന ഈ സിനിമയുടെ ചിത്രീകരണം ഉടന്‍ ആരംഭിക്കും. അതേസമയം, ഈ സിനിമയ്ക്കൊപ്പം തന്നെ ലിങ്കുസാമി സംവിധാനം ചെയ്യുന്ന സിനിമയിലും സൂര്യ അഭിനയിക്കും. അത് ഒരു ആക്ഷന്‍ എന്‍റര്‍‌ടെയ്നറാണ്. ചിത്രത്തിന് ‘റൌഡി’ എന്ന് പേരിട്ടതായി റിപ്പോര്‍ട്ടുകള്‍ വന്നെങ്കിലും ലിങ്കുസാമി അത് നിഷേധിച്ചു.
ഗൌതം വാസുദേവ് മേനോന്‍, ഹരി എന്നിവര്‍ പുതിയ തിരക്കഥകളുമായി സൂര്യയെ സമീപിച്ചെങ്കിലും സൂര്യ അവരോട് ‘നോ’ പറയുകയാണ് ചെയ്തത്. ഇരുവരും വിക്രമിനെ നായകനാക്കി ആ സിനിമകള്‍ ചെയ്യാന്‍ ഒരുങ്ങുന്നതായി റിപ്പോര്‍ട്ടുകള്‍ ലഭിക്കുന്നു.
