വിവാഹത്തിന് മുമ്പ് പെണ്‍കുട്ടിക്ക് ചില മാനസിക പ്രശ്നങ്ങള്‍, കാര്യം അറിഞ്ഞ ഗംഗ നിര്‍ദ്ദേശിച്ചു - ‘ഡോ. സണ്ണിയെ വിളിക്കൂ’ !
ചൊവ്വ, 23 ജൂലൈ 2013 (18:17 IST)
PRO
വിവാഹം തീരുമാനിച്ചുകഴിഞ്ഞാണ് ആ പെണ്‍കുട്ടി മാനസിക വിഭ്രാന്തി കാണിച്ചുതുടങ്ങിയത്. ആദ്യം വീട്ടുകാര്‍ അതത്ര കാര്യമാക്കിയില്ല. എന്നാല്‍ ദിവസം ചെല്ലുന്തോറും പ്രശ്നങ്ങള്‍ കൂടിക്കൂടിവന്നു. കുടുംബ സുഹൃത്തായ ഗംഗ ഇക്കാര്യമറിഞ്ഞപ്പോള്‍ ഒരു ഡോക്ടറെ കാണാന്‍ നിര്‍ദ്ദേശിച്ചു - അത് അയാളായിരുന്നു, ഡോ.സണ്ണി ജോസഫ്. ലോകപ്രശസ്ത മനോരോഗവിദഗ്ധന്‍. അയാളുടെ സഹായം ഗംഗയ്ക്ക് പോലും ഒരിക്കല്‍ ലഭിച്ചതാണ്. ആ കഥയൊക്കെ ഓരോ മലയാളിക്കും അറിയാം.
മണിച്ചിത്രത്താഴിലെ ഡോ. സണ്ണിയും ഗംഗയും വീണ്ടും എത്തുന്നത് പ്രിയദര്‍ശന്‍ സംവിധാനം ചെയ്യുന്ന ‘ഗീതാഞ്ജലി’ എന്ന ചിത്രത്തിലാണ്. ഗംഗയായി ശോഭനയുടെ അഞ്ചുമിനിറ്റ് സാന്നിധ്യം ഗീതാഞ്ജലിയിലുണ്ടാകും. ഡെന്നിസ് ജോസഫ് തിരക്കഥയെഴുതുന്ന ഈ സിനിമയില്‍ മണിച്ചിത്രത്താഴിലെ മറ്റ് രണ്ട് കഥാപാത്രങ്ങള്‍ കൂടിയുണ്ട് - ഉണ്ണിത്താനും(ഇന്നസെന്‍റ്), ദാസപ്പനും(ഗണേഷ്).
പ്രിയദര്‍ശന്‍ ആദ്യമായാണ് ഒരു ഹൊറര്‍ ചിത്രം ചെയ്യുന്നത്. മണിച്ചിത്രത്താഴിന്‍റെ റീമേക്ക് ഹിന്ദിയില്‍ എടുത്തിരുന്നെങ്കിലും അത് പൂര്‍ണമായും ഒരു ഹൊറര്‍ ചിത്രമായിരുന്നില്ല. ധാരാളം നര്‍മ്മരംഗങ്ങളും നാലുഗാനങ്ങളും ഗീതാഞ്ജലിയിലുണ്ടാകും. പ്രിയദര്‍ശന്‍റെ എണ്‍പത്തിയാറാമത്തെ സിനിമയാണ് ഗീതാഞ്ജലി.
