അടുത്ത രണ്ടോ മൂന്നോ വര്‍ഷത്തേക്ക് നിന്നുതിരിയാന്‍ നേരമില്ലാത്തത്ര തിരക്കിലാണ് മെഗാസ്റ്റാര്‍ മമ്മൂട്ടി. 2020 വരെയുള്ള ഡേറ്റുകള്‍ പല സംവിധായകര്‍ക്കായി വീതിച്ചുനല്‍കിയിരിക്കുകയാണ് മമ്മൂട്ടി എന്നാണ് റിപ്പോര്‍ട്ടുകള്‍. അക്കൂട്ടത്തില്‍ ബി ഉണ്ണികൃഷ്ണന്‍ സംവിധാനം ചെയ്യുന്ന ഒരു ത്രില്ലറും ഉള്‍പ്പെടുന്നു എന്നാണ് പുതിയ റിപ്പോര്‍ട്ട്.
മോഹന്‍ലാലിനെ നായകനാക്കി സംവിധാനം ചെയ്യുന്ന ‘വില്ലന്‍’ എന്ന സിനിമയ്ക്ക് ശേഷം മമ്മൂട്ടിച്ചിത്രത്തിന്‍റെ തിരക്കഥാ ജോലികള്‍ ഉണ്ണികൃഷ്ണന്‍ ആരംഭിക്കുമെന്നാണ് റിപ്പോര്‍ട്ടുകള്‍. കുടുംബബന്ധങ്ങള്‍ക്ക് പ്രാധാന്യമുള്ള ഒരു ആക്ഷന്‍ ത്രില്ലറായിരിക്കും ഈ ചിത്രമെന്നാണ് സൂചന.
വമ്പന്‍ ബജറ്റില്‍ ഒരുങ്ങുന്ന ഈ സിനിമയില്‍ മലയാളത്തിലെയും അന്യഭാഷയിലെയും പ്രമുഖ താരങ്ങള്‍ അണിനിരക്കും. ഏറെക്കാലത്തെ ഇടവേളയ്ക്ക് ശേഷമാണ് മമ്മൂട്ടി - ബി ഉണ്ണികൃഷ്ണന്‍ കോമ്പിനേഷനില്‍ ഒരു ചിത്രം വരുന്നത് എന്നതുകൊണ്ടുതന്നെ ആരാധകപ്രതീക്ഷയും ഏറെ ഉയരത്തിലാണ്.
‘പ്രമാണി’ ആണ് ബി ഉണ്ണികൃഷ്ണന്‍ സംവിധാനം ചെയ്ത മമ്മൂട്ടിച്ചിത്രം. അതില്‍നിന്നെല്ലാം വ്യത്യസ്തമായിരിക്കും പുതിയ പ്രൊജക്ട് എന്നാണ് വിവരം.