ഇന്ത്യയില്‍ മറ്റെന്തിനേക്കാളും ആരാധകരുണ്ട് ക്രിക്കറ്റിന്. അതുകൊണ്ട് തന്നെയാണ് രാജ്യത്തിന് പ്രയോജനപ്പെടുത്തേണ്ട മണിക്കൂറുകള്‍ ക്രിക്കറ്റ് നടക്കുമ്പോള്‍ ടെലിവിഷനു മുന്നില്‍ പാഴായിപ്പോകുന്നത്. ക്രിക്കറ്റ് ഇന്ത്യയില്‍ ഒരു മതമാണ്. ഇല്ലാത്തവനു പോലും താരങ്ങള്‍ ദൈവങ്ങളാകുന്നു. എന്നാല്‍ ക്രിക്കറ്റിനും അപ്പുറം ജീവിതമുണ്ടെന്ന് കാണുന്നുണ്ടോ?
ഇക്കാര്യമാണ് പുതിയ ബോളിവുഡ് ചിത്രം ‘മീരാഭായ് നോട്ടൌട്ട്’ പറയുന്നത്. പ്രിതീഷ് നന്ദി ക്രീയേഷന്‍സ് ഒരുക്കുന്ന പുതിയ ചിത്രം ക്രിക്കറ്റ് ജ്വരത്തിനിടയില്‍ ഒരു പ്രണയ കഥ പറയുകയാണ്. ചന്ദ്രകാന്ത് കുല്‍ക്കര്‍ണി ഒരുക്കുന്ന ഈ കൊച്ച് ചിത്രം കാര്യമാത്ര പ്രസക്തമാണ്. ക്രിക്കറ്റിനപ്പുറം ജീവിതം ഉണ്ടെന്ന് ചിത്രം കാണിച്ചു തരുന്നു.
ഇത് ക്രിക്കറ്റിനെയും അനില്‍ കുംബ്ലേയേയും ഭ്രാന്തമായി സ്നേഹിക്കുന്ന മീരയുടെ കഥയാണ്. രഞ്ജി കളിച്ചെങ്കിലും സാമ്പത്തിക ഞെരുക്കം കൊണ്ട് ജീവനെ പോലെ സ്നേഹിക്കുന്ന ക്രിക്കറ്റിനെ വിട്ട് ജോലിക്ക് പോകേണ്ടി വരുന്ന മഹേഷ് അച്ച്‌‌രേക്കരിന്‍റെ കഥയാണ്. ഇതിനൊക്കെ അപ്പുറം മീരയെ ഗാഡമായി പ്രണയിക്കുന്ന ഡോക്ടര്‍ അര്‍ജുന്‍ സച്ച് ദേവിന്‍റെയും കഥയാണ്. മന്ദിരാ ബേദി നായികയാകുന്ന ചിത്രത്തില്‍ ഇന്ത്യന്‍ ടെസ്റ്റ് നായകന്‍ അനില്‍ കുംബ്ലേയും അഭിനയിക്കുന്നു.
IFM
PRO
ക്രിക്കറ്റിനെ അമിതമായി സ്നേഹിക്കുന്ന മീരാ അഛ്രേക്കര് വിശ്വപ്രേം വിദ്യാലയത്തിലെ ഗണിത അദ്ധ്യാപികയാണ്. ക്ലാസ്സില്‍ എന്തിനും ഏതിനും ക്രിക്കറ്റിനെ ഉദാഹരിക്കുന്ന മീരയുടെ പ്രണയം ക്രിക്കറ്റിനോടും അനില്‍ കുംബ്ലേയോടുമാണ്. അതു കൊണ്ട് തന്നെ മീരയുടെ ക്ലാസ്സുകള്‍ എപ്പോഴും ആര്‍പ്പുവിളികളുമായി വിദ്യാര്‍ത്ഥികളെ കൊണ്ട് നിറയും. ഇതാകട്ടെ മറ്റ് അദ്ധ്യാപികമാര്‍ അല്പം അസൂയയോടെ നോക്കുന്നതിനാല്‍ മീര എപ്പോഴും ഒറ്റപ്പെടുകയാണ് പതിവ്.
IFM
IFM
മുംബൈ നഗരത്തിന് സമീപത്ത് താമസിക്കുന്ന മീര വാങ്കഡേ സ്റ്റേഡിയത്തെ ക്ഷേത്രമെന്ന പോലെയാണ് പരിഗണിക്കുന്നത് തന്നെ. സഹോദരന് മഹേഷ് അഛ്‌രേക്കറിനും മീരയുടെ ഭ്രാന്ത് തന്നെയാണ്. മുംബൈയ്‌ക്കായി രഞ്ജി ലെവല്‍ വരെ കളിച്ചെങ്കിലും കുടുംബം പുലര്‍ത്താന്‍ മറ്റ് വഴിയില്ലാത്തതിനാല്‍ എല്ലാ മിഡില്‍ ക്ലാസ് കുടുംബത്തിലെ ചെറുപ്പക്കാരെയും പോലെ മഹേഷും തന്‍റെ പ്രിയപ്പെട്ട കായിക ഇനത്തെ വിട്ട് ജോലിക്ക് പോകാന്‍ നിര്‍ബ്ബന്ധിതനാണ്.
ഇപ്പോഴും മഹേഷ് ക്രിക്കറ്റ് ഭ്രാന്തനായി തുടരുന്നതിനാല്‍ തന്‍റെ ക്ലാസ്സിനിടയില്‍ പോലും വാങ്കഡേ സ്റ്റേഡിയത്തിലെ മത്സരങ്ങളുടെ ടിക്കറ്റുകള്‍ സഹോദരന് സംഘടിപ്പിച്ചു കൊടുക്കുന്നതിന് മീര പോരാട്ടം തന്നെ നടത്തും. അഛ്രേക്കര് കുടുംബത്തിന്‍റെ ഏക ദു:ഖം മീര ഒറ്റയായി തുടരുന്നതാണ്. എന്നാല്‍ പാരമ്പര്യവാദികളായ ഭക്തിയോഗ സമൂഹവുമായുള്ള മീരയുടെ പരിചയം അവളെ തള്ളിവിടുന്നത് ക്രിക്കറ്റിനപ്പുറത്തെ ലോകത്തിലേക്കാണ്.
കൂട്ടത്തില്‍ മീരയുടെ ജീവിതത്തില്‍ ഹാര്‍ട്ട് സ്പെഷ്യലിസ്റ്റായ ഡോക്ടര്‍ അര്‍ജുന്‍ സച്ച് ദേവും വരികയാണ്. ഇന്ത്യന്‍ ടീമിനും അനില്‍ കുംബ്ലേയ്‌ക്കും വേണ്ടി പ്രാര്‍ത്ഥിക്കുന്നതിന് അപ്പുറത്ത് മറ്റെന്തൊക്കെയോ ഉണ്ടെന്ന് മീര മനസ്സിലാക്കുകയാണ്. വാലന്‍റിന്‍‌സ് ദിനത്തില്‍ പുറത്തു പോകുന്ന വേളയില്‍ താന്‍ ക്രിക്കറ്റിനെ എപ്പോഴേ ജീവിത പങ്കാളിയാക്കിയെന്ന് മീര തുറന്ന് പറഞ്ഞെങ്കിലും മീരയുടെ ഹൃദയം തിരിച്ച് പിടിക്കാന്‍ കാത്തിരിക്കുക ആണ് അര്‍ജുന്‍.
IFM
PRO
മഹേഷ് മഞ്‌‌ജ്‌‌രേക്കറും മന്ദിരാബേദിയും പ്രധാന താരങ്ങളാകുന്ന ചിത്രത്തില്‍ അനുപം ഖേര്‍, വന്ദനാ ഗുപ്ത, പ്രതീക്ഷാ ലോങ്കര്‍, ഇജാസ് ഖാന്‍ എന്നിവര്‍ക്കൊപ്പം ഇന്ത്യന്‍ ടെസ്റ്റ് നായകന്‍ അനില്‍ കുംബ്ലേയും ചിത്രത്തില്‍ എത്തുന്നു. രാജീവ് ജയിന്‍ ക്യാമറയും ഹേമല്‍ കോത്താരി എഡിറ്റിംഗും മനോഹര്‍ പാട്ടീല്‍ കല സംവിധാനവും നിര്‍വ്വഹിക്കുന്നു.
