ഭാവിയിലെ മെഗാസ്റ്റാറോ സൂപ്പര്‍സ്റ്റാറോ ആണ് നിവിന്‍ പോളി. യുവാക്കളുടെ ഹരമാണ് നിവിന്‍. റിലീസ് ചെയ്യുന്ന നിവിന്‍ ചിത്രത്തിനായി കാത്തിരിക്കുന്ന ആരാധകര്‍ ഒത്തിരിയുണ്ട്. പ്രത്യേകിച്ച് സിനിമാ പാരമ്പര്യമൊന്നും ഇല്ലാതെയാണ് നിവിന്‍ സിനിമയില്‍ എത്തിയതും ഇന്ന് തന്റേതായ സ്ഥാനം നിലനിര്‍ത്തുന്നതും.
സ്റ്റാര്‍ഡം എന്നത് തന്നെ ബാധിക്കുന്നില്ലെന്നും നിലവില്‍ തനിക്ക് സൂപ്പര്‍താരമെന്ന പദവി ചേരില്ലെന്നുമാണ് നിവിന്‍ പറയുന്നത്. തനിക്ക് കിട്ടുന്ന സിനിമകള്‍ വിജയിപ്പിക്കാന്‍ ശ്രമിക്കുന്ന സാധാ ഒരു നടനാണ് താനെന്നാണ് നിവിന്റെ അഭിപ്രായം. താന്‍ തുടങ്ങിയിട്ടേ ഉള്ളു, തെളിയിക്കാന്‍ ഇനിയും ഒരുപാടുണ്ടെന്ന് താരം പറയുന്നു.
അഭിനയിച്ചു കൊണ്ടിരിക്കുമ്പോള്‍ ബിസിനസ് തുടങ്ങാന്‍ പോയാല്‍ എല്ലാം പോകും. ഒന്നിനും പിന്നെ നിലനില്‍പ്പുണ്ടാകില്ല. രണ്ട് പടങ്ങള്‍ ഹിറ്റാകുമ്പോഴേക്കും രണ്ട് കോടിയുടെ വണ്ടികള്‍ വാങ്ങുന്നവരെ കണ്ടിട്ടുണ്ട്. പിന്നീട് ഈ കടം വീട്ടാന്‍ കിട്ടുന്ന പടങ്ങളിലെല്ലാം കയറി അഭിനയിക്കേണ്ടി വരും. അതോടെ നല്ല ചിത്രങ്ങള്‍ കിട്ടാതാകുമെന്നാണ് നിവിന്‍ പറയുന്നത്. പ്രമുഖ മാധ്യമത്തിന് നല്‍കിയ അഭിമുഖത്തിലാണ് തന്റെ സിനിമാ വിശേഷങ്ങളെ കുറിച്ച് നിവിന്‍ വെളിപ്പെടുത്തിയത്.