' ആ ബന്ധം പിരിയാനുള്ള കാരണം എനിക്ക് ഇപ്പോഴും അറിയില്ല. ഞങ്ങള്‍ക്ക് തമ്മില്‍ എന്താണ് പെട്ടന്ന് ഉണ്ടായതെന്ന മറുപടി എവിടെയും കൊടുക്കാന്‍ എനിക്ക് പറ്റില്ല. പെട്ടന്ന് കോണ്‍ടാക്ട് കട്ട് ചെയ്തു പോയതിന്റെ കാരണം അറിയാന്‍ വേണ്ടി ഞാന്‍ ചേട്ടനെ ബന്ധപ്പെടാന്‍ ശ്രമിക്കുന്നുണ്ട്. പക്ഷേ പറ്റിയിട്ടില്ല. ഞങ്ങള്‍ തമ്മില്‍ എന്തെങ്കിലും കാര്യത്തിനു പിണക്കമോ വഴക്കോ ഉണ്ടാകുമ്പോള്‍ ചേട്ടനു അഭിനയിക്കാന്‍ ബുദ്ധിമുട്ടാണ്. ആ ബുദ്ധിമുട്ട് കാരണമായിരിക്കാം ചിലപ്പോള്‍..! വഴക്ക് കൂടിയ ശേഷം സിനിമയില്‍ അഭിനയിക്കാന്‍ ചെല്ലുമ്പോള്‍ ചേട്ടന്‍ നന്നായി ബുദ്ധിമുട്ടുന്നത് ഞാന്‍ കണ്ടിട്ടുണ്ട്. റിലേഷന്‍ഷിപ്പ് മുന്നോട്ടു കൊണ്ടുപോകാന്‍ പറ്റാത്ത ആളാണ് താനെന്ന് ചേട്ടന്‍ ഒരു അഭിമുഖത്തില്‍ പറയുന്നത് ഞാന്‍ കേട്ടു. പക്ഷേ എനിക്ക് അങ്ങനെ തോന്നിയിട്ടില്ല. എന്നെ അദ്ദേഹം നന്നായി നോക്കിയിട്ടുണ്ട്. എനിക്ക് എന്തെങ്കിലും ഉണ്ടായാല്‍ എനിക്കൊപ്പം ഇരിക്കാറുണ്ട്,' തനൂജ പറഞ്ഞു.
ബ്രേക്കപ്പിനെ കുറിച്ച് ഷൈന്‍ ടോം ചാക്കോയും നേരത്തെ മനസ്സുതുറന്നിരുന്നു. ഒരു കാര്യം സുഖമായി പോകുന്നില്ലെങ്കില്‍ അത് ഒഴിവാക്കുകയാണ് നല്ലതെന്നും താന്‍ ഇപ്പോള്‍ സിംഗിള്‍ ആണെന്നും ഷൈന്‍ പറഞ്ഞു. 'സ്നേഹവും പ്രണയവും രണ്ടാണ്. സ്നേഹം എല്ലാരോടും ഒരുപോലെ ആയിരിക്കും. ആരെയും കുറ്റപ്പെടുത്താനില്ല, സംശയിക്കാനില്ല. പൊസസീവ് ആയിരിക്കില്ല. പ്രണയം പൊസസീവാണ്, സംശയാലുവാണ്. എന്റെ മാത്രമാകണം എന്ന ചിന്ത അങ്ങനെയാണ് വരുന്നത്,' ഷൈന്‍ ഒരു അഭിമുഖത്തില്‍ പറഞ്ഞു.
