ഒമർ ലുലു സംവിധാനം ചെയ്ത ഒരു അഡാറ് ലവ് റിലീസ് ആയെങ്കിലും ചിത്രത്തെ ചുറ്റിപ്പറ്റിയുള്ള വിവാദങ്ങൾ ഇതുവരെ അവസാനിച്ചിട്ടില്ല. മാണിക്യമലരായ പൂവി എന്ന ഗാനത്തിനുശേഷം പ്രിയ വാര്യരും റോഷനും വൻ ഹൈപ്പാണ് സോഷ്യൽ മീഡിയ നൽകിയത്. ആദ്യം ചിത്രത്തിലെ നായികയായി തെരഞ്ഞെടുത്തത് നൂറിനെയായിരുന്നു.
എന്നാൽ, ഈ ഗാനത്തിനും പ്രിയയ്ക്കും വൻ ഹൈപ്പ് ഉണ്ടായതോടെ പ്രിയയ്ക്ക് പ്രാധാന്യമുള്ള രീതിയിൽ കഥ പൊളിച്ചെഴുതിയെന്നും റിപ്പോർട്ടുകൾ ഉണ്ടായിരുന്നു. അതോടൊപ്പം, അടുത്തിടെ നൂറിൻ നടത്തിയ അഭിപ്രായ പ്രകടനങ്ങളും ഏറെ ചർച്ചയ്ക്ക് വഴി തെളിച്ചു.
പ്രിയയെ കുറിച്ച് ചോദിക്കുമ്പോഴൊക്കെ ഒന്നും പറയാനില്ലെന്ന നിലപാടായിരുന്നു ഓരോ അഭിമുഖങ്ങളിലും നൂറിൻ സ്വീകരിച്ചിരുന്നത്. കൂടുതൽ അടുപ്പമില്ലെന്നും പ്രിയയെ കാര്യമായി അറിയില്ലെന്നും അതിനാൽ കൂടുതൽ ഒന്നും പറയാനില്ലെന്നുമായിരുന്നു നൂറിൻ പറഞ്ഞത്.
ഇതോടെ, ഞാൻ മൌനം പാലിച്ചത് എല്ലാവരേയും പോലെ ആകേണ്ടല്ലോ എന്ന് കരുതിയാണെന്നും ഞാൻ വാ തുറന്നാൽ പലരും വെള്ളം കുടിക്കുമെന്നും പ്രിയയും ഇൻസ്റ്റഗ്രാമിൽ പോസ്റ്റ് ചെയ്തിരുന്നു. സംഭവത്തിന്റെ വ്യക്തമായ കാരണം വനിത ഓൺ‌ലൈനോട് പ്രിയ തന്നെ വെളിപ്പെടുത്തുകയാണ്.
‘പിന്നെ നൂറിൻ ഈ സിനിമയെ ഒരുപാട് ആഗ്രഹിച്ചിരുന്നു, പ്രതീക്ഷ വച്ചിരുന്നു. എനിക്കൊപ്പം സ്ക്രീൻ ഷെയർ ചെയ്യേണ്ടി വരും എന്ന് തിരിച്ചറിഞ്ഞത് ഒരു പക്ഷേ അവരെ ചൊടിപ്പിച്ചിട്ടുണ്ടാകും. ഇനി എന്നോട് അഭിപ്രായ വ്യത്യാസമുണ്ടെങ്കിൽ തന്നെ അതായിരിക്കും കാരണം. ഞാനായിട്ട് ആരുടേയും അവസരങ്ങൾ തട്ടിയെടുത്തിട്ടില്ല‘ - പ്രിയ വ്യക്തമാക്കുന്നു.