മീടൂ ആരോപണങ്ങൾ കൊടുങ്കാറ്റ് പോലെ സിനിമാ ലോകത്ത് വീശിക്കൊണ്ടിരിക്കുകയാണ്. തമിഴ് സിനിമാ ലോകത്ത് മീടൂവുന് തുടക്കം കുറിച്ചയാളാണ് ഗായികയും ഡബിംഗ് ആർട്ടിസ്‌റ്റുമായ ചിന്മയി. ഗാനരചയിതാവ് വൈരമുത്തുവിനും നടന്‍ രാധാ രവിക്കുമെതിരെയായിരുന്നു ചിന്മയിയുടെ മീടൂ ആരോപണം.
നിരവധിപേർ പിന്തുണ നൽകിക്കൊണ്ട് എത്തിയെങ്കിലും പല പ്രതിസന്ധികളും ചിന്മയിക്ക് നേരിടേണ്ടിവന്നിരുന്നു. എന്നാൽ മീടൂ ആരോപണത്തിന് ശേഷം തന്റെ ജീവിതം ആകെ മാറിമറിഞ്ഞെന്നാണ് ചിന്മയി പറയുന്നത്. ഇതിന് മുമ്പ് പ്രതിദിനം മൂന്ന് പാട്ടുകൾവെച്ച് പാടാറുണ്ടായിരുന്നു. 'ദ ഹിന്ദു' ഓണ്‍ലൈനിന് നല്‍കിയ അഭിമുഖത്തിലാണ് ചിന്മയി ഇക്കാര്യം വ്യക്തമാക്കിയത്.
വൈരമുത്തുവിനെതിരായ ആരോപണത്തിന് ശേഷം തനിക്ക് അവസരം കുറഞ്ഞതായാണ് ചിന്മയി പറയുന്നത്. തമിഴിലെ തിരക്കേറിയ ഡബ്ബിംഗ് ആര്‍ട്ടിസ്റ്റും ഗായികയുമാണ് ചിന്മയി ശ്രീപാദ. 96 അടക്കമുള്ള ചിത്രങ്ങളില്‍ തൃഷയ്ക്ക് ശബ്ദം നല്‍കിയത് ചിന്മയിയാണ്.
തമിഴ്നാട്ടിലെ ഡബിംഗ് കലാകാരന്മാരുടെ സംഘടനയില്‍ നിന്നും ചിന്മയിയെ പുറത്താക്കുകയും ചെയ്തു. സംഘടനയിലെ അംഗത്വഫീസ് രണ്ടുവര്‍ഷമായി അടച്ചില്ലെന്ന കാരണം പറഞ്ഞാണ് പുറത്താക്കിയത്. എന്നാൽ 2016ല്‍ ഞാന്‍ ഫീസ് ആയി 5000 രൂപ അടച്ചിരുന്നതായും ചിന്മയി പറയുന്നു. അതിന് ശേഷമാണ് ഇരുമ്പ് തിരൈയിലും 96ലും അവസരം ലഭിച്ചത്. അന്നൊന്നും ഒന്നും പറയുകയോ നടപടി എടുക്കുകയോ ചെയ്തില്ല. മീ.ടൂ വെളിപ്പെടുത്തല്‍ നടത്തിയതിന് ശേഷമാണ് ഇത് ഉണ്ടായത്- ചിന്മയി പറഞ്ഞു.