സച്ചി തിരക്കഥയൊരുക്കി നവാഗതനായ അരുണ്‍ ഗോപി സംവിധാനം ചെയ്യുന്ന രാമലീല സെപ്തംബര്‍ 28നു റിലീസ് ചെയ്യും. ദിലീപിനെ കേന്ദ്രകഥാപാത്രമാക്കി ഒരുക്കിയിരിക്കുന്ന ചിത്രത്തിന്റെ റിലീസ് കഴിഞ്ഞ രണ്ട് മാസമായി പ്രതിസന്ധിയിലായിരുന്നു. ദിലീപ് വിവാദങ്ങള്‍ക്കൊടുവില്‍ ചിത്രം തിയ്യേറ്ററുകളില്‍ എത്തുമ്പോള്‍ അണിയറ പ്രവര്‍ത്തകര്‍ നിരാശയിലാണോ ആഹ്ലാദത്തിലാണോ എന്ന് വ്യക്തമല്ല.
എന്നാല്‍, നടിയെ ആക്രമിച്ച കേസുമായി ബന്ധപ്പെട്ട് നടന്‍ ദിലീപ് റിമാന്‍ഡില്‍ കഴിയുകയാണെങ്കിലും രാമലീല തീയേറ്ററുകളില്‍ പരാജയപ്പെട്ടാല്‍ അതിനു കാരണം ഒരിക്കലും ദിലീപ് ആയിരിക്കില്ലെന്ന് തിരക്കഥാകൃത്ത് സച്ചി അടുത്തിടെ ഒരു ഓണ്‍ലൈന്‍ മാധ്യമത്തിനു നല്‍കിയ അഭിമുഖത്തില്‍ വ്യക്തമാക്കുന്നുണ്ട്.
രാമലീല റിലീസ് ചെയ്യുന്നതുമായി ബന്ധപ്പെട്ട് ടെന്‍ഷനില്ലെന്ന് സച്ചി പറയുന്നു. ഇപ്പോള്‍ ഈ സിനിമയ്ക്ക് എതിരെയുള്ള മുറവിളി ദിലീപ് എന്ന നടന്റെ വ്യക്തി ജീവിതവുമായി ബന്ധപ്പെട്ടാണ്. സിനിമ നല്ലതാണെങ്കില്‍ അതിനെ പൂര്‍ണമായും ഏറ്റെടുത്തിട്ടുള്ളവരാണ് മലയാളികള്‍. അതുകൊണ്ട് തന്നെ ഈ സിനിമ പരാജയപ്പെട്ടാല്‍ അത് സിനിമയുടെ മാത്രം കുഴപ്പം കൊണ്ടായിരിക്കുമെന്ന് സച്ചി പറയുന്നു.