വളരെ കുറച്ചു സിനിമകളിലേ ശാലുമേനോന്‍ അഭിനയിച്ചിട്ടുള്ളൂ. സീരിയലുകളിലാണ് ശാലു കൂടുതലായി ശ്രദ്ധ കേന്ദ്രീകരിച്ചത്. മോഹന്‍ലാലിനൊപ്പം കാക്കക്കുയിലില്‍ അഭിനയിച്ചിട്ടുള്ള ശാലുമേനോന്‍ കവര്‍ സ്റ്റോറി, വക്കാലത്ത് നാരായണന്‍‌കുട്ടി, മകള്‍ക്ക്, കിസാന്‍, ഇന്ദ്രജിത്ത്, ഇത് പാതിരാമണല്‍ തുടങ്ങിയ സിനിമകളുടെ ഭാഗമായി.
ഇപ്പോഴിതാ, ശാലുമേനോന്‍ വീണ്ടും മോഹന്‍ലാല്‍ ചിത്രത്തില്‍. എം പത്മകുമാര്‍ സംവിധാനം ചെയ്യുന്ന ‘കനല്‍’ എന്ന സിനിമയിലാണ് മോഹന്‍ലാലിനൊപ്പം ശാലുമേനോന്‍ അഭിനയിക്കുന്നത്. നെഗറ്റീവ് ഷേഡുള്ള ഒരു കഥാപാത്രമായിരിക്കും ശാലു അവതരിപ്പിക്കുക. കഥയില്‍ നിര്‍ണായകപ്രാധാന്യമുള്ള ഈ കഥാപാത്രം മലയാള സിനിമയില്‍ ശാലുമേനോന്‍റെ വന്‍ തിരിച്ചുവരവുകൂടിയായിരിക്കും എന്നാണ് പ്രതീക്ഷിക്കപ്പെടുന്നത്.
