കൊച്ചിയിൽ യുവനടിയെ തട്ടിക്കൊണ്ടുപോയി ആക്രമിച്ച കേസില്‍ നടൻ ദിലീപിനെതിരെ മഞ്ജു വാര്യർ പ്രധാനസാക്ഷിയാകുമെന്ന് പൊലീസ്. കഴിഞ്ഞ ഫെബ്രുവരിയില്‍ സംഭവം നടന്നതിന്റെ തൊട്ടടുത്ത ദിവസം നടന്ന സിനിമാതാരങ്ങളുടെ സംഘടനയായ അമ്മയുടെ മീറ്റിങ്ങില്‍ ഈ കേസില്‍ വലിയ ഗൂഢാലോചനയാണ് നടന്നിരിക്കുന്നതെന്നകാര്യം ആദ്യം പറഞ്ഞത് മഞ്ജു വാര്യര്‍ ആയിരുന്നു. ഇതായിരിക്കാം പൊലീസിന്റെ ഇത്തരമൊരു നീക്കത്തിനു പിന്നിലെന്നാണ് സൂചന.
മഞ്ജു ഈ കേസില്‍ പ്രധാന സാക്ഷിയാകുമെന്ന തരത്തില്‍ നേരത്തെ തന്നെ വാര്‍ത്ത വന്നിരുന്നു. എന്നാല്‍ ആ വാര്‍ത്ത മഞ്ജു നിഷേധിക്കുകയും ഈ കേസില്‍ താന്‍ സാക്ഷിയാകില്ലെന്ന് വ്യക്തമാക്കുകയും ചെയ്തിരുന്നു. അതിനിടയിലായിരുന്നു തനിക്ക് തുടര്‍ച്ചയായി ജാമ്യം നിഷേധിക്കുന്നതിനു പിന്നില്‍ മഞ്ജു വാര്യരും എഡിജിപി ബി സന്ധ്യയുമാണെന്ന് ദിലീപ് ആരോപിച്ചത്.
