ക്യാപ്റ്റന്‍ സ്ഥാനം വഹിച്ചുകൊണ്ടുള്ള അവസാന മത്സരത്തില്‍ കോലി ബാറ്റ് ചെയ്യാന്‍ ഇറങ്ങാതിരുന്നത് എന്തുകൊണ്ടാണെന്ന് ആരാധകര്‍ക്കിടയില്‍ നേരത്തെ ചോദ്യം ഉയര്‍ന്നിരുന്നു. നമീബിയക്കെതിരെ രോഹിത് ശര്‍മയുടെ വിക്കറ്റ് നഷ്ടമായ ശേഷം വണ്‍ഡൗണ്‍ ആയി ക്രീസിലെത്തിയത് സൂര്യകുമാര്‍ യാദവ് ആണ്. തന്റെ ബാറ്റിങ് പൊസിഷനില്‍ സൂര്യകുമാറിനു വേണ്ടി സ്വയം താഴോട്ട് ഇറങ്ങുകയാണ് കോലി ചെയ്തത്.
ലോകകപ്പില്‍ സൂര്യകുമാറിന് അത്ര നല്ല ഓര്‍മകളില്ലെന്നും നല്ല ഓര്‍മകളുമായി ടി 20 ലോകകപ്പ് അവസാനിപ്പിക്കാനാണ് ഏതൊരു താരവും ആഗ്രഹിക്കുകയെന്നും കോലി പറഞ്ഞു. 'ലോകകപ്പില്‍ സൂര്യക്ക് അധികം കളിക്കാന്‍ സാധിച്ചിട്ടില്ല. നമീബിയക്കെതിരെ അദ്ദേഹത്തെ നേരത്തെ ബാറ്റ് ചെയ്യാന്‍ ഇറക്കിയത് അതുകൊണ്ടാണ്. ടി 20 ലോകകപ്പില്‍ അദ്ദേഹത്തിനു നല്ലൊരു ഓര്‍മയായിരിക്കും ഇത്. അതുകൊണ്ടാണ് ഞാന്‍ താഴോട്ട് ഇറങ്ങി സൂര്യയെ മൂന്നാം നമ്പറില്‍ ഇറക്കിയത്,' കോലി പറഞ്ഞു.
