ബംഗ്ലാദേശിനെതിരായ ടി20 പരമ്പരയ്ക്കുള്ള ഇന്ത്യന്‍ ക്രിക്കറ്റ് ടീമിനെ പ്രഖ്യാപിച്ചു. സൂര്യകുമാര്‍ യാദവ് നയിക്കുന്ന ടീമില്‍ വിക്കറ്റ് കീപ്പര്‍ താരമായി മലയാളി താരം സഞ്ജു സാംസണ്‍ ഇടം നേടി.ഐപിഎല്ലില്‍ ശ്രദ്ധ നേടിയ പേസ് ബൗളിംഗ് സെന്‍സേഷന്‍ മായങ്ക് യാദവും ഹര്‍സ്ഷിത് റാണയും ടീമിലുണ്ട്. അഭിഷേക് ശര്‍മ മാത്രമാണ് ടീമിലെ ഓപ്പണിംഗ് ബാറ്റര്‍. അതിനാല്‍ തന്നെ സഞ്ജു സാംസണെ ടീം ഓപ്പണറായി പരിഗണിക്കാന്‍ സാധ്യതയേറെയാണ്.
നിതീഷ് കുമാര്‍ റെഡ്ഡി,മായങ്ക് യാദവ്,ഹര്‍ഷിത് റാണ എന്നിവരാണ് ടീമിലെ പുതുമുഖങ്ങള്‍. ഹാര്‍ദ്ദിക് പാണ്ഡ്യ,റിയാന്‍ പരാഗ്, ശിവം ദുബെ,രവി ബിഷ്‌ണോയ്, വരുണ്‍ ചക്രവര്‍ത്തി,ജിതേഷ് ശര്‍മ,വാഷിങ്ങ്ടണ്‍ സുന്ദര്‍,അര്‍ഷദീപ് സിംഗ്,റിങ്കു സിംഗ് എന്നിവരാണ് ടീമിലെ മറ്റ് താരങ്ങള്‍. കെ എല്‍ രാഹുല്‍,ശ്രേയസ് അയ്യര്‍,റുതുരാജ് ഗെയ്ക്വാദ്,ഇഷാന്‍ കിഷന്‍ എന്നിവരെ ടീമില്‍ പരിഗണിച്ചില്ല.
