10 ഫോറും ഏഴ് സിക്സും! കൂട്ടി നോക്കുക. പന്ത് അതിര്‍ത്തികടത്തി മാത്രം നേടിയത് 82 റണ്‍സ്. അതും ഒരു ടെസ്റ്റ് മത്സരത്തില്‍. ബാറ്റ് ചെയ്യുന്നത് രോഹിത് ശര്‍മയാണെങ്കില്‍ മാത്രം സംഭവിക്കുന്ന കാര്യം. അതേ, രണ്ടാം ഇന്നിംഗ്സിലും സെഞ്ച്വറി നേടി ഓപ്പണര്‍ രോഹിത് ശര്‍മ ദക്ഷിണാഫ്രിക്കയുടെ സ്വപ്നങ്ങള്‍ക്ക് മേല്‍ തീവിതറി.
രോഹിത് ശര്‍മ ടെസ്റ്റില്‍ ഓപ്പണറാകുന്നതില്‍ ഇനി ആര്‍ക്കെങ്കിലും സംശയം അവശേഷിച്ചിട്ടുണ്ടെങ്കില്‍ അതും അവസാനിപ്പിക്കുന്നതായിരുന്നു ഈ ഇന്നിംഗ്സ്. ഓപ്പണറാകാന്‍ അവസരം ലഭിച്ച ആദ്യ ടെസ്റ്റില്‍ തന്നെ രണ്ട് ഇന്നിംഗ്സിലും സെഞ്ച്വറി നേടുക. ഒരു അസാധാരണ പ്രതിഭയ്ക്ക് മാത്രം സാധിക്കുന്ന കാര്യം. കഴിഞ്ഞ ഇന്നിംഗ്സിലെ പങ്കാളി മായങ്ക് അഗര്‍വാളിനെ ഇത്തവണ തുടക്കത്തിലേ നഷ്ടമായെങ്കിലും ചേതേശ്വര്‍ പൂജാരയെ കൂട്ടുപിടിച്ചായിരുന്നു രോഹിത് ശര്‍മ ദക്ഷിണാഫ്രിക്കയെ വട്ടം ചുറ്റിച്ചത്.
