ഇന്ത്യ-ഓസ്ട്രേലിയ സെമിഫൈനലിന് ഒരു ദിവസം മാത്രം ബാക്കിനില്‍ക്കെ വാക്പോരുമായി ഓസ്ട്രേലിയന്‍ താരങ്ങള്‍ വീണ്ടും രംഗത്ത്. സെമിയില്‍ ടീം ഇന്ത്യയെ ചീത്തവിളിച്ച് ആത്മവിശ്വാസം തകര്‍ക്കാനുള്ള ചുമതല ഓപ്പണര്‍ ഡേവിഡ് വാര്‍ണര്‍ക്കാണ് ടീം ഓസ്ട്രേലിയ നല്‍കിയിരിക്കുന്നത്. എന്നാല്‍ വാര്‍ണര്‍ ആ കടമ ചെയ്‌തില്ലെങ്കില്‍ താന്‍ ചെയ്യുമെന്ന് പേസ് ബോളര്‍ മിച്ചല്‍ ജോണ്‍സണ്‍ വ്യക്തമാക്കി.
സെമിയില്‍ ഇന്ത്യന്‍ താരങ്ങളെ ചീത്തവിളിച്ച് പ്രകോപിപ്പിക്കും. ഡേവിഡ് വാര്‍ണര്‍ അത് ചെയ്യാന്‍ ഒരുക്കമല്ലെങ്കില്‍ താന്‍ വിളിക്കുമെന്നും ജോണ്‍സണ്‍ പ്രഖ്യാപിച്ചു. വഹാബ് റിയാസ്-ഷെയ്ന്‍ വാട്സണ്‍ പോര് അസാമാന്യമായിരുന്നുവെന്നും അദ്ദേഹം പറഞ്ഞു. ടെസ്റ്റ് പരമ്പരയില്‍ ഇന്ത്യന്‍ താരങ്ങളുമായി വാഗ്വാദത്തിലേര്‍പ്പെട്ട വാര്‍ണര്‍ പക്ഷെ ലോകകപ്പില്‍ നല്ലനടപ്പിലാണ്.