ഐ പി എല്ലിലെ പുതിയ ഫ്രാഞ്ചൈസിയായ കൊച്ചി ടീം തന്നെ സമീപിച്ചിട്ടില്ലെന്ന് മുന്‍ ഇന്ത്യന്‍ ക്രിക്കറ്റ് ടീം ക്യാപ്റ്റന്‍ സൗരവ് ഗാംഗുലി. കൊച്ചിയെക്കുറിച്ച് അറിയില്ല. ഇതുവരെ ഒരു ടീമും ഐ പി എല്ലിന്റെ നാലാം സീസണില്‍ കളിക്കുന്നതിനായി ക്ഷണിച്ചിട്ടില്ലെന്നും ഗാംഗുലി വ്യക്തമാക്കി.
ഐപി‌എല്‍ കളിക്കാര്‍ക്കുള്ള ലേലത്തില്‍ ഒരു ടീമും സ്വന്തമാക്കാതിരുന്ന ഗാംഗുലിക്ക് വേണ്ടി കൊച്ചി ടീം രംഗത്തെത്തിയതായി നേരത്തെ റിപ്പോര്‍ട്ടുകളുണ്ടായിരുന്നു. ഗാംഗുലിയെ ടീമിലെടുക്കാന്‍ അനുവദിക്കണമെന്ന് കൊച്ചി ഐ പി എല്‍ ടീം ബിസിസിഐയോട് ആവശ്യപ്പെട്ടുവെന്നുമായിരുന്നു വാര്‍ത്തകള്‍.
ഐ പി എല്‍ ചട്ടങ്ങള്‍ അനുസരിച്ച് മറ്റ് ഫ്രാഞ്ചൈസികള്‍ക്കും എതിര്‍പ്പില്ലെങ്കില്‍ തുറന്ന ലേലത്തിലൂടെ ഒരു കളിക്കാരനെ വീണ്ടും ലേലത്തിലെടുക്കാം. മറ്റ് ടീമുകള്‍ എതിര്‍പ്പ് രേഖപ്പെടുത്തതിനാല്‍ കൊച്ചി ഗാംഗുലിയെ സ്വന്തമാക്കുമെന്നായിരുന്നു റിപ്പോര്‍ട്ടുകള്‍. ഇക്കാര്യമാണ് ഇപ്പോള്‍ ഗാംഗുലി നിഷേധിച്ചിരിക്കുന്നത്.
