ഇരുന്നൂറാം ടെസ്റ്റ് വേദി എവിടെ വേണമെന്ന് സച്ചിന് തീരുമാനിക്കാം!
ശനി, 7 സെപ്‌റ്റംബര്‍ 2013 (17:19 IST)
PRO
PRO
ഇരുന്നൂറാം ടെസ്റ്റ് വേദി സംബന്ധിച്ച അനിശ്ചിതത്വം തുടരുന്നതിനാല്‍ വേദി എവിടെ വേണമെന്ന് തീരുമാനം സച്ചിന് വിട്ട് കൊടുക്കാന്‍ ക്രിക്കറ്റ് ബോര്‍ഡ് തീരുമാനിച്ചതായി റിപ്പോര്‍ട്ട്. വേദി നിശ്ചയിക്കുന്നതിനുള്ള അന്തിമ തീരുമാനം സച്ചിന് വിട്ടുകൊടുക്കാനാണ് ബോര്‍ഡ് നീങ്ങുന്നത്.
ഇരുന്നൂറാം ടെസ്റ്റിനുള്ള വേദി നിശ്ചയിക്കുന്നതിന് മുമ്പ് സച്ചിനുമായി ഇക്കാര്യം ചര്‍ച്ച ചെയ്യുമെന്നും ബോര്‍ഡ് വൃത്തങ്ങള്‍ സൂചിപ്പിച്ചു. വേദിക്കായി മുംബൈ, ബംഗാള്‍ ക്രിക്കറ്റ് അസോസിയേഷനുകള്‍ ശക്തമായി രംഗത്തുള്ളതാണ് ബോര്‍ഡിനെ ഇങ്ങനെയൊരു തീരുമാനത്തിലേക്ക് നയിച്ചത്.
സച്ചിന് വിരമിക്കുമെന്ന അഭ്യൂഹത്തെത്തുടര്‍ന്ന് നവംബറില്‍ ഇന്ത്യയും വെസ്റ്റിന്‍ഡീസുമായി നടക്കുന്ന ടെസ്റ്റ് പരമ്പരയിലെ രണ്ടാം മത്സരം മുംബൈയില്‍ നടത്താനായിരുന്നു ബിസിസിഐ തീരുമാനിച്ചിരുന്നത്.
എന്നാല്‍ വേദിക്കുവേണ്ടിയുള്ള പോര് തുടങ്ങിയത്തോടെ തീരുമാനം അനിശ്ചിതത്വത്തിലായി. സച്ചിന് വിരമിക്കുമോ ഇല്ലയോ എന്നതുസംബന്ധിച്ച് ബോര്‍ഡിന് ഇപ്പോഴും കൃത്യമായ ധാരണയില്ല. ഇതുസംബന്ധിച്ച് സച്ചിനും മൌനത്തിലാണ്.
