ഇന്ത്യയ്ക്ക് ഇന്ന് വിന്‍ഡീസിനോട് ജീവന്‍ മരണപോരാട്ടമാണ്. ഇന്നത്തെ കളിയില്‍ വിന്‍ഡീസിനോട് തോറ്റാല്‍ ത്രിരാഷ്ട്ര ക്രിക്കറ്റ് ടൂര്‍ണമെന്റില്‍ നിന്ന് ഇന്ത്യ പുറത്താകും. പരുക്കേറ്റ ധോണിയ്ക്ക് പകരം വിരാട് കോഹ്‌ലിയായിരിക്കും ഇന്ത്യയെ നയിക്കുക.
കഴിഞ്ഞ ശ്രീലങ്കയ്ക്കെതിരായ കളിയിലും കോഹ്‌ലിയായിരുന്നു നായകന്‍. ആ കളിയില്‍ ഇന്ത്യ ദയനീയമായി തോറ്റിരുന്നു. ഇന്നത്തെ വിന്‍ഡീസുമായിട്ടുള്ള കളി ഇന്ത്യയ്ക്ക് ഏറേ നിര്‍ണായകമാ‍ണ്. രണ്ട് മത്സരം ജയിച്ചിട്ടുള്ള വിന്‍ഡീസ് സമ്മര്‍ദമില്ലാതെയാകും ഇന്ത്യയെ നേരിടുക.
സ്വന്തം നാട്ടില്‍ കളിക്കുന്നുവെന്ന ആനുകൂല്യം വിന്‍ഡീസിന് ആത്മവിശ്വാസം നല്‍കും. ഇന്ന് ജയിക്കാനായാല്‍ ആതിഥേയര്‍ ഫൈനലില്‍ എത്തും. അതോടെ ഫൈനല്‍ കാണാതെ ഇന്ത്യന്‍ ടീമിന് നാട്ടിലേക്ക് മടങ്ങേണ്ടി വരും. കഴിഞ്ഞ രണ്ടു മല്‍സരങ്ങളും പരാജയപ്പെട്ട ഇന്ത്യയ്ക്ക് പോയിന്റൊന്നുമില്ല.
മൂന്നു ടീമുകള്‍ രണ്ടു മല്‍സരം വീതം പൂര്‍ത്തിയാക്കുമ്പോള്‍ ഒമ്പതു പോയിന്റോടെ വിന്‍ഡീസാണ് മുന്നില്‍. രണ്ടാം സ്ഥാനത്തുള്ള ശ്രീലങ്കയ്ക്ക് അഞ്ചു പോയിന്റുണ്ട്.