ഗാംഗുലി ഫോറടിക്കുമ്പോള്‍, ശ്രീശാന്ത് വിക്കറ്റെടുക്കുമ്പോള്‍, ധോനി കൂറ്റന്‍ സിക്സര്‍ പറത്തുമ്പോള്‍ ഇന്ത്യാ‍ക്കാര്‍ തുള്ളിച്ചാടും. എന്നാല്‍ സെഞ്ച്വറിക്ക് മൂന്ന്‌‌റണ്‍ പിന്നില്‍ സച്ചിന്‍ ഔട്ടാകുമ്പോള്‍, ലോകകപ്പിലെ ആദ്യ റൌണ്ടില്‍ പുറത്താകുമ്പോള്‍ ഇതേ ആവേശം തന്നെ താരങ്ങളുടെ കോലം കത്തിക്കല്‍ വീടിനു നേരെ തെറി അഭിഷേകം, ഭീഷണി എന്നീ നടപടികളിലേക്കും പോകും. ക്രിക്കറ്റിനു വലിയ ആരാധനയുള്ള ഇന്ത്യയില്‍ താരങ്ങള്‍ പൊതുസ്വത്താണ്.
എന്നാല്‍ ഈ താരങ്ങള്‍ മനുഷ്യരാണെന്നും ഇവര്‍ക്ക് വിശ്രമം ആവശ്യമുണ്ടെന്നും തിരിച്ചറിയാത്ത ഏക കൂട്ടം ഇന്ത്യന്‍ ക്രിക്കറ്റ് ഭരിക്കുന്ന ബി സി സി ഐ സാരഥികളായിരിക്കും. പണം ലക്‍‌ഷ്യമിട്ട് ബി സി സി ഐ കളിയുടെ പിന്നാലെ പോകുമ്പോള്‍ സീനിയര്‍ ജൂണിയര്‍ വ്യത്യാസമില്ലാതെയാണ് താരങ്ങളെ പരുക്ക് പിടികൂടുന്നത്. സഹീര്‍ ഖാന്‍, ശ്രീശാന്ത്, ആര്‍ പി സിംഗ്, മുനാഫ്, ഹര്‍ഭജന്‍, മുരളി കാര്‍ത്തിക്ക്, യുവ്‌രാജ്, സച്ചിന്‍, ദേ ഇപ്പോള്‍ ഇഷാന്തും.
ബൌളര്‍മാരാണ് കൂടുതലും പരുക്കിനിരയാകുന്നവര്‍. ക്രിക്കറ്റ് ബോര്‍ഡ് പണമുണ്ടാക്കാന്‍ താരങ്ങളെ മാടിനെ പോലെ പണിയെടുപ്പിക്കുന്നത് മൂലം കളിക്കാര്‍ക്ക് ആവശ്യമായ വിശ്രമം ലഭിക്കാത്തതും പരുക്ക് പൂര്‍ണ്ണമായി ഭേദമാകാന്‍ അവസരം നല്‍കാത്തതുമാണ് ഈ ദുരന്തത്തിനു കാരണം. ഓസ്ട്രേലിയയിലും ദക്ഷിണാഫ്രിക്കയിലുമെല്ലാം പാറിച്ച വിജയം നിലനിര്‍ത്തണമെങ്കില്‍ കളിക്കാരുടെ കായിക ക്ഷമതയിലും ബി സി സി ഐ ശ്രദ്ധിക്കേണ്ടതുണ്ട്.
ഓസ്ട്രേലിയയില്‍ ഇതിഹാസ വിജയം നേടാന്‍ ഇന്ത്യയെ സഹായിച്ച കൌമാരക്കാരന്‍ ഇഷാന്ത് ശര്‍മ്മയാണ് പരുക്കേറ്റ താരങ്ങളില്‍ അവസാനത്തെ ആള്‍. ഇന്ത്യന്‍ ടീമിനൊപ്പം കാലങ്ങള്‍ ചെലവഴിക്കുന്നതിനു മുമ്പ് തന്നെ താരത്തെ പരുക്കും പിടികൂടി. ദക്ഷിണാഫ്രിക്കയ്‌ക്കെതിരെ ആദ്യ ടെസ്റ്റില്‍ നിന്നും ഈ 19 കാരനെ ഇന്ത്യന്‍ ക്രിക്കറ്റ് ബോര്‍ഡ് ഒഴിവാക്കി. എങ്കിലും രണ്ടാം ടെസ്റ്റില്‍ താരത്തെ തിരികെ കൊണ്ടുവരാമെന്ന് ബി സി സി ഐ കരുതുന്നുണ്ടാകാം.
ഓസീസ് പര്യടനങ്ങളിലെ ത്രിരാഷ്ട്ര മത്സരങ്ങളില്‍ 153 കിലോ മീറ്റര്‍ സ്പീഡില്‍ സ്ഥിരമായി പന്തെറിയുകയും വിക്കറ്റുകള്‍ വാരിക്കൂട്ടുകയും ചെയ്ത താരമാണ് ഇഷാന്ത്. ഓസ്ട്രേലിയയിലെ മത്സരങ്ങള്‍ക്കിടയില്‍ പരുക്ക് പറ്റിയ താരത്തിന് മതിയായ വിശ്രമം ലഭിച്ചിരുന്നില്ല. പരുക്ക് പൂര്‍ണ്ണമായി ഭേദമാകാതെ തുടര്‍ന്നും കളിക്കേണ്ടി വന്നതാണ് ഡല്‍‌ഹി താരത്തെ സ്വന്തം മണ്ണില്‍ ദക്ഷിണാഫ്രിക്കയ്‌ക്ക് എതിരെയുള്ള ആദ്യ മത്സരത്തില്‍ കളിക്കാന്‍ കഴിയാത്ത നിലയിലാക്കിയത്.
PRO
PRO
ദക്ഷിണാഫ്രിക്കയ്‌ക്ക് എതിരെയുള്ള ടീമിനെ തെരഞ്ഞെടുക്കാനുള്ള യോഗത്തില്‍ ഉണ്ടായിരുന്ന പുതിയ പരിശീലകന്‍ ഗാരി കിര്‍സ്റ്റന്‍ ഇഷാന്തിനു നിര്‍ബ്ബന്ധമായി വിശ്രമം നല്‍കാന്‍ നിര്‍ദേശിച്ചതോടെയാണ് താരത്തെ ഒഴിവാക്കിയത്. കായിക ക്ഷമത പൂര്‍ണ്ണമായും വീണ്ടെടുത്ത ശേഷം കളിപ്പിച്ചാല്‍ മതെയെന്ന് ഗാരികിര്‍സ്റ്റന്‍ നിര്‍ബ്ബന്ധം തന്നെ പിടിക്കുക ആയിരുന്നു. മൂന്നാഴ്ചയെങ്കിലും ഇഷാന്തിനു വിശ്രമം ആവശ്യമായി വരുമെന്നാണ് ഫിറ്റ്നസ് ടെസ്റ്റില്‍ നിന്നുള്ള സൂചന.
നല്ല വിശ്രമം ലഭിച്ചില്ലെങ്കില്‍ ഓസ്ട്രേലിയയിലെ പോലെയുള്ള മികച്ച ഫലം ഇഷാന്തിന് ഉണ്ടാക്കാന്‍ കഴിയാതെ വരുമെന്നാണ് കിര്‍സ്റ്റന്‍ പറഞ്ഞത്. അതുകൊണ്ട് തന്നെ ഇഷാന്ത് മുരളി കാര്‍ത്തിക്കിനൊപ്പം ആയി. ഇന്ത്യ കാര്യമായിട്ട് മുമ്പും ഉപയോഗിച്ചിട്ടില്ലാത്ത് ഈ സ്പിന്നര്‍ക്കും പരുക്കേറ്റു. ദേവ്ധര്‍ ട്രോഫി ക്രിക്കറ്റിലെ മത്സരത്തിനിടയിലാണ് മുരളി കാര്‍ത്തിക്കിനു പരുക്ക് ലഭിച്ചത്. എന്നിരുന്നാലും മൂന്നാം സ്പിന്നറാക്കി ഇന്ത്യ ടീമില്‍ എടുത്തേക്കാം.
പൂര്‍ണ്ണമായും കായിക ക്ഷമത വീണ്ടെടുക്കാന്‍ ടീം ഫിസിയോ ബെഡ് റെസ്റ്റ് ഉള്‍പ്പടെ മൂന്ന് മുതല്‍ ആറാഴ്ചത്തെ വിശ്രമമാണ് മുരളി കാര്‍ത്തിക്കിന് നിര്‍ദേശിച്ചിരിക്കുന്നത്. സമാന ഗതിയാണ് ഏകദിന ഉപനായകന്‍ യുവരാജ് സിംഗിനും ഓഫ് സ്പിന്നര്‍ ഹര്‍ഭജന്‍ സിംഗിനും രണ്ടു പേരും ടീമില്‍ ഉള്‍പ്പെട്ടെങ്കിലും ഹര്‍ഭജന്‍ സിംഗ് ഇപ്പോഴും കളിക്കുമെന്ന് പൂര്‍ണ്ണമായും പറയാനാകില്ല. സഹീര്‍ ഖാനും മുനാഫ് പട്ടേലും ഇതുവരെ ടീമിലേക്ക് മടങ്ങിവന്നിട്ടു പോലുമില്ല. മത്സരാധിക്യം മാസ്റ്റര്‍ ബ്ലാസ്റ്റര്‍ സച്ചിനെയും കടന്ന് പിടിച്ചിരിക്കുകയാണ്.
ഒട്ടേറെ ക്രിക്കറ്റ് കളിക്കേണ്ടി വരുന്നതിനാല്‍ കളിക്കാര്‍ക്ക് മതിയായ വിശ്രമവും പരുക്കിനു ശേഷം പൂര്‍ണ്ണമാകാനുള്ള സമയവും നല്‍കണമെന്ന് കായിക പരിശീലകന്‍ ജോണ്‍ ഗ്ലോസ്റ്ററും വ്യക്തമാക്കുന്നു. തുടര്‍ച്ചയായുള്ള ക്രിക്കറ്റും പരുക്ക് നിര്‍ത്തിക്കൊണ്ടുള്ള കളിയും ഇന്ത്യന്‍ താരങ്ങളുടെ കരിയറിനു തന്നെ കരി നിഴല്‍ വീഴ്ത്തുന്ന സാഹചര്യത്തിലാണ് ഐ പി എല്ലിന്‍റെ കൂടി വരവ്. പരിശീലനവും മത്സരങ്ങളുമായി താരങ്ങള്‍ക്ക് ഇനി ഒട്ടും തന്നെ വിശ്രമം ഇല്ലാതെ വരും.