ബറോസിന്റെ വിശേഷങ്ങള്‍ പങ്കു വെച്ചിരിക്കുകയാണ് ലാലിന്റെ ഭാര്യ സുചിത്ര. മോഹന്‍ലാല്‍ സംവിധാനം ചെയ്യാന്‍ എടുത്ത തീരുമാനം നന്നായി എന്നും തനിക്ക് ഇഷ്ടമുള്ള സംവിധായകനായി അദ്ദേഹം മാറുമെന്നതില്‍ സംശയമില്ലെന്നും സുചിത്ര പറഞ്ഞു. ചിത്രത്തിന്റെ തിരക്കഥ വായിച്ചതിനെക്കുറിച്ചും മോഹന്‍ലാല്‍ ആദ്യം ബറോസിനെ കുറിച്ച് പറഞ്ഞ കാര്യങ്ങളും താര പത്‌നി പറയുന്നുണ്ട്.
'ബറോസിനെക്കുറിച്ച് പറയുകയാണെങ്കില്‍, എന്നോട് ഒരു ദിവസം വന്നു പറഞ്ഞു, ഞാന്‍ ഒരു ത്രീ ഡി പടത്തില്‍ അഭിനയിക്കാന്‍ പോകുകയാണ്, നല്ല പടമാണ് എന്നൊക്കെ. ഞാന്‍ ഓര്‍ത്തു കൊള്ളാമല്ലോ. കുട്ടിച്ചാത്തനു ശേഷം വരുന്ന ത്രീ ഡി പടം നന്നായിരിക്കുമല്ലോ. പിന്നീട് അതിന്റെ തിരക്കഥ വീട്ടില്‍ കൊണ്ട് വന്നപ്പോള്‍ ഞാനും വായിച്ചു.അതിന്റെ സാങ്കേതികവശങ്ങള്‍ എല്ലാം വിശദമായി പറഞ്ഞിട്ടുണ്ടായിരുന്നു. ബറോസ് സംവിധാനം ചെയ്യാന്‍ എടുത്ത തീരുമാനം വളരെ നന്നായി എന്നാണ് കരുതുന്നത്.ജിജോ സാറിന്റെ സാങ്കേതിക സഹായം ഏറെ നിര്‍ണ്ണായകമാകും എന്ന് കരുതുന്നു. ഞാന്‍ ഏറ്റവും ഇഷ്ടപ്പെടുന്ന ഒരു സംവിധായകനായി അദ്ദേഹം മാറും എന്നതില്‍ സംശയമില്ല.'- സുചിത്ര പറഞ്ഞു. 'ബാറോസ്' പൂജ ചടങ്ങില്‍ സംസാരിക്കുകയായിരുന്നു അവര്‍.
