Actor Srikanth Arrest: 7 ലക്ഷം രൂപയ്ക്ക് ശ്രീകാന്ത് കൊക്കെയ്ൻ വാങ്ങി, കുടുങ്ങിയത് രക്തപരിശോധനയിൽ, അന്വേഷണം കൂടുതൽ താരങ്ങളിലേക്ക്
നടനും മയക്കുമരുന്ന് വില്‍പ്പനക്കാരും തമ്മില്‍ നാലര ലക്ഷത്തിന്റെ ഇടപാടുകള്‍ നടന്നതായി പോലീസ് അന്വേഷണത്തില്‍ കണ്ടെത്തിയിരുന്നു. കഴിഞ്ഞ ദിവസമാണ് എഐഡിഎംകെയുടെ പ്രവര്‍ത്തകനായ പ്രസാദിനെ മറ്റൊരു കേസില്‍ പോലീസ് അറസ്റ്റ് ചെയ്തത്. തുടര്‍ന്ന് ഇയാള്‍ക്ക് മയക്കുമരുന്ന് വില്പനയടക്കമുള്ള ഇടപാടുകളുള്ളതായി പോലീസ് കണ്ടെത്തി. പ്രസാദ് ശ്രീകാന്തിന് മയക്കുമരുന്ന് നല്‍കിയതായി വെളിപ്പെടുത്തിയതോടെയാണ് നടനെതിരെ അന്വേഷണം നീങ്ങിയത്. പ്രസാദിന് മയക്കുമരുന്ന് എത്തിച്ച് നല്‍കിയിരുന്ന പ്രദീപ് എന്നയാളെയും പോലീസ് പിടികൂടി. പ്രദീപുമായും ശ്രീകാന്തിന് ഇടപാടുകളുണ്ടെന്നാണ് സൂചന.
ഒരു ഗ്രാം കൊക്കെയ്ന് 12000 രൂപ നിരക്കിലാണ് ശ്രീകാന്ത് വാങ്ങിയിരുന്നതെന്നും ഇത്തരത്തില്‍ പലപ്പോഴായി 7.72 ലക്ഷം രൂപയുടെ കൊക്കെയ്ന് താരം വാങ്ങിയിട്ടുണ്ടെന്നും പ്രസാദ് വെളിപ്പെടുത്തിയിരുന്നു. ഇതിന് പിന്നാലെ നടത്തിയ രക്തപരിശോധനയിലാണ് മയക്കുമരുന്ന് ഉപയോഗം തെളിഞ്ഞത്. അതേസമയം ലഹരി ഇടപാടുമായി ബന്ധമുണ്ടെന്ന് കരുതുന്ന നടന്‍ കൃഷ്ണയോടും ചോദ്യം ചെയ്യലിന് ഹാജരാകാന്‍ പോലീസ് ആവശ്യപ്പെട്ടിട്ടുണ്ട്.
