വൻ ഹൈപ്പിൽ വന്ന കമൽ ഹാസൻ-മണിരത്നം സിനിമ തഗ് ലൈഫിന് പ്രതീക്ഷയ്‌ക്കൊത്തുയരാൻ സാധിച്ചില്ല. സമ്മിശ്ര പ്രതികരണമാണ് ചിത്രത്തിന് തിയറ്ററുകളിൽ നിന്ന് ലഭിക്കുന്നത്. സിമ്പു, തൃഷ, അശോക് സെൽവൻ, ഐശ്വര്യ ലക്ഷ്മി തുടങ്ങിയവരാണ് സിനിമയിലെ മറ്റ് കഥാപാത്രങ്ങളെ അവതരിപ്പിച്ചത്. നെഗറ്റീവ് അഭിപ്രായം വരുന്നതോടെ, ദുൽഖർ സൽമാനെയും രവി മോഹനെയും കൈയ്യടിക്കുകയാണ് സോഷ്യൽ മീഡിയ. അതിന് പിന്നിലൊരു കാരണവുമുണ്ട്.
തഗ് ലൈഫിൽ നടൻ ചിമ്പു ചെയ്ത അമർ എന്ന കഥാപാത്രത്തിനായി ആദ്യം പരിഗണിച്ചത് നടൻ ദുൽഖർ സൽമാനെയായിരുന്നു. എന്നാൽ ദുൽഖറിന് മറ്റു സിനിമകളുടെ തിരക്കുകൾ കാരണം ചിത്രത്തിന്റെ ഭാഗമാകാൻ കഴിഞ്ഞിരുന്നില്ല. തഗ് ലൈഫ് ഒഴിവാക്കിയതിന് പിന്നാലെ ദുൽഖറിന് വൻ തോതിൽ വിമർശനങ്ങളും നേരിടേണ്ടി വന്നിരുന്നു. മണിരത്നം-കമൽ ഹാസൻ സിനിമ വേണ്ടെന്ന് വെയ്ക്കുന്നത് കരിയറിലെ ഏറ്റവും മോശം തീരുമാനം ആണെന്ന് പലരും ദുല്ഖറിനോട് പറഞ്ഞു.
എന്നാൽ, വിമർശകരെ കൊണ്ട് തന്നെ കയ്യടിപ്പിക്കുകയാണ് ദുൽഖർ. തഗ് ലൈഫ് റിലീസിനെത്തിയതോടെ ദുൽഖർ തന്റെ കരിയറിൽ എടുത്ത ഏറ്റവും മികച്ച തീരുമാനങ്ങളിൽ ഒന്നായിരുന്നു ഇതെന്നാണിപ്പോൾ സോഷ്യൽ മീഡിയയിൽ നിറയുന്ന കമന്റുകൾ. നടൻ രവി മോഹനെയും (ജയം രവി) ചിത്രത്തിൽ ഒരു കഥാപാത്രത്തിനായി പരിഗണിച്ചിരുന്നു. ജയം രവിയും മറ്റ് സിനിമാ തിരക്കുകൾ കാരണമാണ് തഗ് ലൈഫ് ഒഴിവാക്കിയത്. ഇരുവരും എന്തുകൊണ്ടും തഗ് ലൈഫ് ഒഴിവാക്കിയത് നന്നായി എന്ന് തന്നെയാണ് ആരാധകരും സോഷ്യൽ മീഡിയ ഉപയോക്താക്കളും ഒന്നടങ്കം പറയുന്നത്.
'തഗ് ലൈഫിൽ നിന്ന് ഒഴിവായപ്പോൾ മണ്ടത്തരം കാണിച്ച പോലെ തോന്നി... പക്ഷേ ദുൽഖറിന്റെ ഏറ്റവും മികച്ച തീരുമാനം', 'എന്ത് കൊണ്ടും തഗ് ലൈഫിൽ നിന്ന് ഒഴിവായത് DQന് ഗുണം ആയതേ ഉള്ളൂ... പകരം പോയി ചെയ്തത് ലക്കി ഭാസ്കർ. പടം 100cr കേറി, ബ്ലോക്ബസ്റ്ററും ആയി, തെലുങ്കാന ഫിലിം അവാർഡും കിട്ടി...'- എന്നൊക്കെയാണ് സോഷ്യൽ മീഡിയയിൽ നിറയുന്ന കമന്റുകൾ.
