ആസിഫ് അലിയുടെ ഏറ്റവും പുതിയ ചിത്രമായ ആഭ്യന്തര കുറ്റവാളി കോടി ക്ലബുകളുടെ പേരിൽ ചർച്ച ചെയ്യപ്പെടേണ്ട സിനിമയല്ലെന്ന് നടൻ ജഗദീഷ്. മമ്മൂട്ടി നായകനായ കാതൽ പോലെ തന്നെ മികച്ച സിനിമകളുടെ ലിസ്റ്റിൽ ഇടംപിടിച്ച് ചർച്ച ചെയ്യപ്പെടേണ്ട സിനിമയാണ് ആഭ്യന്തര കുറ്റവാളി എന്നാണ് ജഗദീഷ് പറയുന്നത്. ആഭ്യന്തര കുറ്റവാളിയുടെ പ്രൊമോഷന്റെ ഭാഗമായി നടന്ന പ്രസ് മീറ്റിൽ സംസാരിക്കുകയായിരുന്നു ജഗദീഷ്.
'മമ്മൂക്കയുടെ കാതൽ നല്ല പടമാണ്. അത് എത്ര കോടി ക്ലബ്ബിൽ കയറി എന്ന് ആരും അന്വേഷിച്ചിട്ടില്ല. നല്ല ചിത്രത്തിൻറെ പട്ടികയിലാണ് നമ്മൾ പെടുത്തുന്നത്. അതുപോലെ 'ആഭ്യന്തര കുറ്റവാളി' എത്ര കോടി ക്ലബ്ബിലെന്ന് ആരും ചർച്ച ചെയ്യില്ല, ഉറപ്പാണ്. എത്ര കിട്ടിയാലും സന്തോഷമാണ്. ആഭ്യന്തര കുറ്റവാളി ഇന്ത്യൻ സാഹചര്യത്തിൽ നമുക്ക് സ്വീകാര്യമാവുന്ന കാര്യമാണ്. ചില സിനിമകളാണ് ഇത്ര കോടി ക്ലബ്ബിൽ കടക്കാൻ സാധ്യതയുള്ളത്. സൂപ്പർ സ്റ്റാർ എന്ന പദവിയിലേക്ക് ചിലപ്പോൾ ആസിഫ് അലി എത്തുമായിരിക്കും. ഇന്ന് സൂപ്പർ സ്റ്റാർ എന്ന വിശേഷണം അദ്ദേഹത്തിന് താൽപര്യമില്ല, നമുക്കും താൽപര്യമില്ല. അദ്ദേഹത്തെ സൂപ്പർ ആക്ടർ എന്ന് വിശേഷിപ്പിക്കാനാണ് താൽപര്യം,' എന്ന് ജഗദീഷ് പറഞ്ഞു.
