ലാല്‍ ജോസ് സംവിധാനം ചെയ്ത് ദിലീപ്, കാവ്യ മാധവന്‍, ലാല്‍, ബിജു മേനോന്‍, സംയുക്ത വര്‍മ എന്നിവര്‍ കേന്ദ്ര കഥാപാത്രങ്ങളെ അവതരിപ്പിച്ച സിനിമയാണ് ചന്ദ്രനുദിക്കുന്ന ദിക്കില്‍. തിയറ്ററുകളില്‍ ചിത്രം സൂപ്പര്‍ഹിറ്റ് ആയതിനൊപ്പം ദിലീപ്-കാവ്യ ജോഡികള്‍ മലയാളത്തില്‍ ശ്രദ്ധിക്കപ്പെട്ട സിനിമ കൂടിയായിരുന്നു അത്. കാവ്യ നായികാവേഷത്തിലെത്തിയ ആദ്യ സിനിമ. പിന്നീടങ്ങോട്ട് ദിലീപ്-കാവ്യ മാധവന്‍ കൂട്ടുകെട്ടില്‍ ഒട്ടേറെ ഹിറ്റ് സിനിമകള്‍ പിറന്നു. എന്നാല്‍, ചന്ദ്രനുദിക്കുന്ന ദിക്കില്‍ എന്ന സിനിമയില്‍ നായികാവേഷത്തിലേക്ക് ആദ്യം പരിഗണിച്ചിരുന്ന കാവ്യയെയല്ല.
ബാലതാരമായി മലയാള സിനിമയിലെത്തിയ അമ്പിളിയെയാണ് ചന്ദ്രനുദിക്കുന്ന ദിക്കില്‍ എന്ന സിനിമയിലെ നായികയായി ആദ്യം ആലോചിച്ചിരുന്നത്. സൂപ്പര്‍ഹിറ്റ് കോമഡി ചിത്രമായ മീനത്തില്‍ താലിക്കെട്ടില്‍ ദിലീപിന്റെ അനിയത്തിയായി അമ്പിളി അഭിനയിച്ചിട്ടുണ്ട്. ലാല്‍ ജോസ് ചിത്രം ചന്ദ്രനുദിക്കുന്ന ദിക്കില്‍ ദിലീപിന്റെ നായികയാകാന്‍ തനിക്ക് ക്ഷണം ലഭിച്ചിരുന്നതായി അമ്പിളി തന്നെയാണ് തുറന്നുപറഞ്ഞിട്ടുള്ളത്.
