ആത്മീയയുടെ വാക്കുകള്‍
എന്റെ മനസ്സില്‍ സിനിമാ സ്വപ്നവും അഭിനയമോഹവും അച്ഛനോളം വളര്‍ത്തിയ മറ്റാരുമില്ല. സിനിമയില്‍ ആദ്യമായി ക്ഷണം ലഭിക്കുന്നത് ബാലതാരമായായിരുന്നു. അത് ചെയ്യാന്‍ സാധിച്ചില്ലെങ്കിലും അതിന്റെ മുന്നൊരുക്കമെന്നോണം അച്ഛനെന്നോട് അഭിനയിച്ചു കാണിക്കാന്‍ ആവശ്യപ്പെട്ടു. ' അച്ഛന്‍ ഇപ്പോ മരിച്ചുപോയി എന്ന് ആരെങ്കിലും പറഞ്ഞു എന്നു ചിന്തിക്കൂ.. മോള്‍ എന്താ ചെയ്യാ..? അച്ഛനെ കാണിച്ചേ..! ' ഇത് കേട്ട് പിണങ്ങി മാറി നിന്ന എന്നെ പൊട്ടിച്ചിരിച്ച് ചേര്‍ത്ത് പിടിച്ച് അച്ഛന്‍ പറഞ്ഞു, ' അച്ഛന്‍ വെറുതെ അഭിനയിക്കാന്‍ പറഞ്ഞതല്ലേ...'
