പ്രേമം മറക്കുക. ബാംഗ്ലൂര്‍ ഡെയ്സ് മറക്കുക. ദൃശ്യം മറക്കുക. ഇനി ചാര്‍ലിയുടെ കാലമാണ്. അതേ, ചാര്‍ലിയുടെ ആഘോഷകാലം. റിലീസായ ആദ്യത്തെ നാലുനാളുകള്‍ക്കുള്ളില്‍ ചിത്രം കേരളത്തിലെ തിയേറ്ററുകളില്‍ നിന്ന് വാരിക്കൂട്ടിയത് ആറുകോടി രൂപ. മലയാളികളുടെ സ്വന്തം ‘കുഞ്ഞിക്ക’ ബോക്സോഫീസ് കിംഗായി മാറുന്ന കാഴ്ച!
ദുല്‍ക്കര്‍ സല്‍മാനും പാര്‍വതിയും തകര്‍ത്തഭിനയിക്കുന്ന ഈ മാര്‍ട്ടിന്‍ പ്രക്കാട്ട് ചിത്രം മലയാള സിനിമയുടെ ബോക്സോഫീസ് ചരിത്രമാകെ മാറ്റിമറിക്കുമെന്നാണ് റിപ്പോര്‍ട്ടുകള്‍. കേരളത്തില്‍ സമാനതകളില്ലാത്ത കളക്ഷന്‍ നേടുന്ന സിനിമ ഇപ്പോള്‍ കേരളത്തിന് പുറത്തും റിലീസ് ചെയ്തിരിക്കുകയാണ്. ചെന്നൈ, കോയമ്പത്തൂര്‍, ഹൈദരാബാദ്, പുനെ, മുംബൈ, ബാംഗ്ലൂര്‍, മൈസൂര്‍, മംഗലാപുരം, മണിപ്പാല്‍, ഡല്‍ഹി, ഗുജറാത്ത് എന്നിവിടങ്ങളിലും ചിത്രം എത്തിയിട്ടുണ്ട്.
