കൊച്ചി മൾട്ടിപ്ലക്സിൽ ഒരു കോടി കളക്ഷനരികെ എത്തി നിൽക്കുകയാണ് മമ്മൂട്ടിയുടെ ഗ്രേറ്റ് ഫാദർ. കണ്ടവർ വീണ്ടും വീണ്ടും കാണുന്നു. കുടുംബപ്രേക്ഷകരുടെ ഹൃദയം കീഴടക്കി മുന്നേറുകയാണ് ഡേവിഡ് നൈനാനും സാറയും. 11 ദിവസം കൊണ്ട് ചിത്രം കൊച്ചി മൾട്ടിപ്ലക്സിൽ നിന്നും കളക്റ്റ് ചെയ്തത് 89.34 ലക്ഷം രൂപയാണ്.
മാർച്ച് 30ന് റിലീസ് ചെയ്ത ചിത്രം കളക്ഷന്റെ കാര്യത്തിൽ ആദ്യ ദിന റെക്കോർഡുകൾ പലതും തകർത്തിരുന്നു. റിലീസ് ചെയ്ത് പന്ത്രണ്ടാം ദിവസം എത്തിനിൽക്കുകയാണ്. 7,09,535 രൂപയാണ് പതിനൊന്നാം ദിവസം ചിത്രം കളക്റ്റ് ചെയ്തത്. 80 ശതമാനം ഒക്യുപൻസിയിലാണ് ചിത്രം ഇപ്പോഴും പ്രദർശനം തുടരുന്നത്.
ഗ്രേറ്റ്ഫാദർ വിജയത്തിൽ മമ്മൂക്ക പ്രേക്ഷകർക്ക് നന്ദി പറഞ്ഞ് രംഗത്തെത്തിയിരുന്നു. 'ഗ്രേറ്റ്ഫാദർ പുതിയ വിജയഗാഥകൾ രചിക്കുന്നുവെന്ന് അറിയുന്നതിൽ വളരെ സന്തോഷം. ഈ വിജയം നിങ്ങളോടൊപ്പമാണ് ഞങ്ങൾ ആഘോഷിക്കുന്നത്. ഈ സിനിമയെ കണ്ട് അതിനെ പ്രോത്സാഹിപ്പിച്ച് വലിയ വിജയമാക്കുകയും പുതിയ വിജയചരിത്രമുണ്ടാക്കുകയും ചെയ്ത പ്രേക്ഷകർക്ക് നന്ദി. ഈ സിനിമയുടെ പിന്നിൽ കഷ്ടപ്പെട്ട് പ്രവർത്തിച്ച ഒരുപാട് സാങ്കേതിവിദഗ്ധരുണ്ട്. അവരുടെ പേരിലും ഞാൻ നന്ദി പറയുന്നു.’ എന്നായിരുന്നു മമ്മൂട്ടി പറഞ്ഞ‌ത്.