ശിവ കാര്‍ത്തികേയന്‍ നായകനാകുന്ന ‘റെമോ’പ്രദര്‍ശനത്തിനെത്തുകയാണ്. മലയാളത്തില്‍ പുലിമുരുകനും തോപ്പില്‍ ജോപ്പനും വരുന്നതിനൊപ്പമാണ് റെമോയും വരുന്നത്. എന്തായാലും ആരാധകര്‍ക്ക് മികച്ച ഒരു എന്‍റര്‍ടെയ്നറാണ് ഭാഗ്യരാജ് കണ്ണന്‍ എന്ന സംവിധായകന്‍ ഒരുക്കിയിരിക്കുന്നത്. ശിവ കാര്‍ത്തികേയന്‍ ആദ്യമായി പെണ്‍‌വേഷത്തില്‍ അഭിനയിക്കുന്നു എന്നതാണ് ഏറ്റവും വലിയ ഹൈലൈറ്റ്.
മലയാളത്തില്‍ ദിലീപ് അവതരിപ്പിച്ച ‘മായാമോഹിനി’യുടെ ഫോര്‍മാറ്റിലുള്ള സിനിമയാണ് റെമോ എന്നാണ് സൂചന. എന്തായാലും അടുത്തിടെയൊന്നും ശിവ കാര്‍ത്തികേയന്‍ മായാമോഹിനി കണ്ടില്ല. അതിന് കാരണവുമുണ്ട്. “ദിലീപ് സാറിന്‍റെ മായാമോഹിനിയെല്ലാം ഞാന്‍ കണ്ടിട്ടുണ്ട്. എന്നാല്‍ ഈ സിനിമ കമ്മിറ്റായതിന് ശേഷം ഞാന്‍ അത്തരം സിനിമകള്‍ കണ്ടില്ല. എനിക്ക് ചിലപ്പോള്‍ അപകര്‍ഷതാ ബോധം തോന്നും. അയ്യോ ഈ രീതിയില്‍ എനിക്ക് അഭിനയിക്കാന്‍ കഴിയില്ലല്ലോ എന്നോര്‍ത്ത്. ഈ സിനിമ പൂര്‍ത്തിയായതിന് ശേഷമാണ് വീണ്ടും ഞാന്‍ അത്തരം പടങ്ങള്‍ കാണുന്നതിലേക്ക് വന്നത്” - മനോരമ ഓണ്‍ലൈനിന് അനുവദിച്ച അഭിമുഖത്തില്‍ ശിവ കാര്‍ത്തികേയന്‍ പറയുന്നു.
