ഷെയ്ൻ നിഗം വിഷയത്തിൽ സമവായ ചർച്ചകൾ നീളാൻ സാധ്യത. ഡൽഹിയിലുള്ള ഷെയ്ൻ തിരിച്ചെത്തിയ ശേഷം മാത്രമായിരിക്കും ഇനി ചർച്ചകളെന്നാണ് സൂചന. ഷെയ്നുമായി അമ്മ ഭാരവാഹികൾ ആദ്യം ചർച്ച ചെയ്യും. അതിന് ശേഷമാകും മറ്റ് സംഘടനകളുമായുള്ള ചർച്ചകളുണ്ടാവുക. നിര്‍മ്മാതാക്കളുമായുള്ള ചര്‍ച്ചയ്ക്ക് മുന്‍പ് ഷെയ്ന്‍ നിഗം കൊച്ചിയിലെത്തി തങ്ങളെ നേരിട്ട് കാണണമെന്ന നിര്‍ദ്ദേശം അമ്മ സെക്രട്ടറി ഇടവേള ബാബുവാണ് നടന്‍റെ സുഹൃത്തുക്കള്‍ മുഖേനെ ഷെയ്ന്‍ നിഗത്തെ അറിയിച്ചത്.
ഷെയ്ൻ നിഗത്തിന്‍റെ അമ്മ സുനില നല്‍കിയ കത്ത് പരിഗണിച്ചുകൊണ്ടായിരുന്നു വിഷയത്തില്‍ ഇടപെടാന്‍ താരസംഘടന തീരുമാനിച്ചത്. ചര്‍ച്ചയ്ക്കായി ബുധനാഴ്ച്ച കൊച്ചിയില്‍ എത്താന്‍ സംഘടനാ ഭാരവാഹികള്‍ സുഹൃത്തുക്കള്‍ മുഖേനെ നടനോട് ആവശ്യപ്പെട്ടിരുന്നു. എന്നാൽ ഇതുവരെ ഷെയ്ൻ എത്താത്തത് എല്ലാവരിലും അതൃ‌പ്തി ഉളവാക്കിയിട്ടുണ്ട്.
