രണ്ട് സമുദായം, ഒന്നിച്ചു ജീവിക്കാന്‍ വീട്ടുകാര്‍ സമ്മതിക്കില്ലെന്ന് തോന്നിയപ്പോള്‍ സിനിമ സ്റ്റൈല്‍ ജീവിതത്തിലേക്ക്; സഹോദരിയുടെ സുഹൃത്തായ സജിത വല്ലപ്പോഴും വീട്ടില്‍ വരും, പ്രണയം പൂവിട്ടു
ഒന്നിച്ചു ജീവിക്കാന്‍ വീട്ടുകാര്‍ സമ്മതിക്കില്ലെന്ന് തോന്നിയപ്പോഴാണ് സജിതയെ രഹസ്യമായി തന്റെ മുറിയില്‍ താമസിപ്പിക്കാന്‍ റഹിമാന്‍ തുനിഞ്ഞത്. ഒന്നും രണ്ടും ദിവസമല്ല, പത്ത് വര്‍ഷത്തോളമാണ് റഹിമാന്റെ മുറിയില്‍ സജിത ഒളിച്ചുതാമസിച്ചത്. അവരുടെ പ്രണയം അത്രത്തോളം ഗാഢമായിരുന്നു. രണ്ട് സമുദായത്തില്‍ നിന്നുള്ളവരായതിനാല്‍ ഇരു വീട്ടുകാരും എതിര്‍പ്പ് പ്രകടിപ്പിക്കുമെന്ന് റഹിമാനും സജിതയ്ക്കും ഉറപ്പായിരുന്നു. എന്നാല്‍, പിരിയാന്‍ ഇരുവരുടെയും മനസ് സമ്മതിച്ചില്ല. റഹിമാന്റെ വീട്ടില്‍ നിന്ന് പത്തുവീട് അകലെയാണ് സജിതയുടെ വീട്. റഹിമാന്റെ സഹോദരിയുടെ സുഹൃത്ത് കൂടിയായിരുന്നു സജിത. കൂട്ടുകാരിയെ കാണാന്‍ സജിത വല്ലപ്പോഴും റഹിമാന്റെ വീട്ടിലേക്ക് എത്തിയിരുന്നു. ഇങ്ങനെയാണ് റഹിമാനും സജിതയും തമ്മില്‍ അടുക്കുന്നത്. പിന്നീട് ഇരുവരുടെയും പ്രണയം വേര്‍പിരിയാന്‍ സാധിക്കാത്ത വിധം വളര്‍ന്നു. 18-ാം വയസ്സിലാണ് സജിത വീടുവിട്ടിറങ്ങി റഹിമാന്റെ ഒപ്പം ജീവിക്കാന്‍ എത്തുന്നത്.
