ഡിജിറ്റല്‍ മ്യൂസിക് കമ്പനിയായ ജിയോ മ്യൂസികും സ്ട്രീമിംഗ് സര്‍വീസ് പ്രൊവൈഡറായ സാവനും ഒന്നാകുന്നു. ഒരു ബില്യണ്‍ ഡോളറിന്‍റെ ഡീലാണ് ഇത്. ഈ ഡീല്‍ റിലയന്‍സ് ജിയോയ്ക്ക് കൊണ്ടുവരുന്ന നേട്ടം ചെറുതല്ല. സാവനുമായി കൈകോര്‍ക്കുമ്പോള്‍ ഒരു വലിയ സംഗീതശേഖരമാണ് ജിയോയ്ക്ക് സ്വന്തമാകുന്നത്. സാവനുമായി പങ്കാളിത്തമുണ്ടാകുമ്പോള്‍ അത് ഇന്ത്യന്‍ സ്ട്രീമിംഗ് ഇന്‍ഡസ്ട്രിയില്‍ ജിയോയുടെ സാന്നിധ്യത്തിന് കൂടുതല്‍ കരുത്തുപകരും. ജിയോ-സാവന്‍ കൂട്ടുകെട്ട് ഉപഭോക്താക്കള്‍ക്ക് സംഗീതത്തിന്‍റെ വലിയ സാധ്യതകളാണ് തുറന്നുകൊടുക്കുന്നത്.
ഈ കൂടിച്ചേരല്‍ അന്താരാഷ്ട്രതലത്തിലുള്ള വലിയ ഒരു പ്ലാറ്റ്ഫോമായി വളരുമെന്നാണ് റിലയന്‍സ് പ്രതീക്ഷിക്കുന്നത്. ഈ പുതിയ കൂട്ടുകെട്ടിലും സാവന്‍റെ കോ ഫൌണ്ടര്‍മാരായ റിഷി മല്‍ഹോത്ര, പരം‌ധീപ് സിംഗ്, വിനോദ് ഭട്ട് എന്നിവര്‍ നേതൃതലത്തില്‍ തന്നെ തുടരും.
അനന്തമായ ഡിജിറ്റല്‍ എന്‍റര്‍ടെയ്‌ന്മെന്‍റെ സേവനങ്ങള്‍ ശക്തവും തടസമില്ലാത്തതുമായ ഒരു നെറ്റുവര്‍ക്കിലൂടെ തുടരാനും ഡിജിറ്റല്‍ എക്കോ സിസ്റ്റത്തെ കൂടുതല്‍ പുഷ്ടിപ്പെടുത്താനുമുള്ള തങ്ങളുടെ പ്രതിജ്ഞാബദ്ധതയാണ് സാവനുമായുള്ള ഈ കൂടിച്ചേരല്‍ അടയാളപ്പെടുത്തുന്നതെന്ന് റിലയന്‍സ് ജിയോ ഡയറക്‍ടര്‍ ആകാശ് അംബാനി അറിയിച്ചു.
