കൊല്‍ക്കത്തയെ നിലം‌പരിശാക്കി, കെ എസ് ഇ ബി ജേതാക്കൾ !

തിരുവനന്തപുരത്ത് നടന്ന നാല്‍പ്പത്തൊന്നാമത് അഖിലേന്ത്യാ ഇലക്ട്രിസിറ്റി സ്പോർട്സ് കണ്‍‌ട്രോൾ ബോർഡ് വോളിബോൾ ടൂർണമെന്റിൽ ആതിഥേയരായ കെഎസ്ഇബി ടീം ജേതാക്കളായി. ഫൈനലിൽ കൊൽക്കത്തയെ എതിരില്ലാത്ത 3 സെറ്റുകൾക്ക് പരാജയപ്പെടുത്തിയാണ് കെ എസ് ഇ ബി പുരുഷ ടീം വിജയം കൊയ്തത്. 

കഴിഞ്ഞ വർഷവും കെ എസ് ഇ ബിയായിരുന്നു ഒന്നാം സ്ഥാനത്ത്. പഞ്ചാബ് ടീമാണ് മൂന്നാം സ്ഥാനത്ത്. വിജയികൾക്ക് കെ എസ് ഇ ബി ഡയറക്ടർ (വിതരണം & സുരക്ഷ) ബി നീന സമ്മാനങ്ങൾ വിതരണം ചെയ്തു. 

കഴിഞ്ഞ വർഷം ദേശീയ വോളിബോൾ ബാസ്കറ്റ് ബോൾ ടീമുകളിൽ ഇടം നേടുകയും അന്താരാഷ്ട്ര മത്സരങ്ങളിൽ വലിയ നേട്ടങ്ങൾ കൊയ്യുകയും ചെയ്ത 10 വനിതാതാരങ്ങളെയും കോച്ചിനെയും ചടങ്ങിൽ ആദരിച്ചു. 

ഫൈനൽ മത്സരത്തെ തുടർന്ന് കെ എസ് ഇ ബി, കേരള പോലിസ് വനിതാ വോളിബോൾ ടീമുകളുടെ സൗഹൃദമത്സരവും നടന്നു.