ഉത്തര്‍പ്രദേശിലെ ലക്കിംപൂര്‍ഖേരി ഗ്രാമത്തില്‍ വൃദ്ധയായ സ്ത്രീയെ ഒരു സംഘം അക്രമികള്‍ ക്രൂരമായി മര്‍ദ്ദിക്കുകയും വിവസ്ത്രയാക്കുകയും ചെയ്തു. മകൻ പെൺകുട്ടിയോടൊപ്പം ഒളിച്ചോടിയതിന്റെ പേരിലാണ് ഈ ക്രൂരത അരങ്ങേറിയത്. അക്രമികള്‍ അറുപതുകാരിയായ വൃദ്ധയുടെ മുഖത്ത് കരിഓയിൽ ഒഴിക്കുകയും സ്വകാര്യ ഭാഗങ്ങളില്‍ മുളകുപൊടി വിതറുകയും ചെയ്തുവെന്ന് പൊലീസ് പറഞ്ഞു. പെൺകുട്ടിയുടെ വീട്ടുകാരാണ് ഈ ക്രൂരതയ്ക്ക് പിന്നിൽ.
കഴിഞ്ഞ ദിവസമായിരുന്നു യുവാവും യുവതിയും ഒളിച്ചോടിയത്. വിവരമറിഞ്ഞെത്തിയ പെണ്‍കുട്ടിയുടെ വീട്ടുകാര്‍ വൃദ്ധയെ തല്ലിച്ചതച്ചു. കൂടാതെ അവരുടെ ഭര്‍ത്താവിനെയും മര്‍ദ്ദിച്ചവശനാക്കി. നാട്ടുകാരും പൊലീസും ചേര്‍ന്നാണ് സ്ത്രീയെ അക്രമികളിൽനിന്നും രക്ഷിച്ചത്. ഗുരുതരാവസ്ഥയിലായ വൃദ്ധയെ അടുത്തുള്ള ആശുപത്രിയില്‍ പ്രവേശിപ്പിച്ചു.
