രാജ്യത്തെ ഭൂരിപക്ഷവും ജെല്ലിക്കെട്ടിനെതിരാണെന്നു മേനക ഗാന്ധി പറയുന്നു. ഇക്കാര്യത്തില്‍ തനിക്കോ ബിജെപിക്കോ മറ്റാര്‍ക്കെങ്കിലുമോ അഭിപ്രായം പറയാനാകില്ല. ജെല്ലിക്കെട്ട് നിരോധിച്ചതിനു സുപ്രിംകോടതിയുടെ ഉത്തരവ് എല്ലാവരും മാനിക്കേണ്ടതാണെന്നും അവര്‍ പറഞ്ഞു. ജെല്ലിക്കെട്ട് നിരോധനത്തിനു വേണ്ടി എന്നും ശക്തമായി രംഗത്തുണ്ടായിരുന്നയാളാണു മേനക ഗാന്ധി. മേനകയുടെ പ്രസ്താവനയ്‌ക്കെതിരെ കടുത്ത പ്രതിഷേധം മധുര മേഖലയില്‍ ഉയരുന്നുണ്ട്. അതിനിടെയാണ് മേനകയുടെ നിലപാട് തള്ളി കേന്ദ്രമന്ത്രി പൊന്‍ രാധാകൃഷ്ണന് രംഗത്തെത്തിയത്.
സുപ്രിംകോടതി ഏര്‍പ്പെടുത്തിയ നിരോധനം നീക്കാനുള്ള ശ്രമത്തിലാണു ബിജെപിയെന്ന് അദ്ദേഹം പറഞ്ഞു. സംസ്ഥാന ബിജെപി നേതൃത്വം ജെല്ലിക്കെട്ട് നിരോധനം നീക്കാനായി ശക്തമായി രംഗത്തുണ്ട്. സുപ്രിംകോടതി ഉത്തരവിനെ മറികടക്കാനായ കഴിഞ്ഞ വര്‍ഷം കേന്ദ്ര സര്‍ക്കാര്‍ പ്രത്യേക ഓര്‍ഡിനന്‍സ് കൊണ്ടുവന്നെങ്കിലും മൃഗസ്‌നേഹികളുടെ സംഘടന ഇതിനെതിരെ രംഗത്തെത്തുകയും സുപ്രിംകോടതിയെ സമീപിക്കുകയും ചെയ്തു. തുടര്‍ന്നു സര്‍ക്കാര്‍ ഓര്‍ഡിനന്‍സ് സുപ്രിംകോടതി സ്‌റ്റേ ചെയ്യുകയുമായിരുന്നു.
