രാജ്യത്തെ നടുക്കിയ ഷീന ബോറ കേസ് അന്വേഷിച്ച സംഘത്തിലെ പൊലീസുകാരന്‍റെ ഭാര്യയെ മകന്‍ കൊലപ്പെടുത്തിയ സംഭവത്തിന് പിന്നില്‍ കാരണങ്ങള്‍ പലതാണെന്ന് പൊലീസ്. മാതാവ് ദിപാലിയെ മകന്‍ സിദ്ധാന്ത്(20) ചൊവ്വാഴ്ച രാത്രി എട്ടുമണിക്കാണ് കൊലപ്പെടുത്തിയത്. കൊലപാതകത്തിന് ശേഷം രക്ഷപ്പെട്ട സിദ്ധാന്തിനെ പിന്നീട് പൊലീസ് പിടികൂടി.
കോളജില്‍ നിന്ന് സിദ്ധാന്തിന് ലഭിച്ച മാര്‍ക്ക് ഷീറ്റ് ദിപാലി ആവശ്യപ്പെടുകയും അതേത്തുടര്‍ന്ന് ഉണ്ടായ തര്‍ക്കവുമാണ് കൊലപാതകത്തില്‍ കലാശിച്ചതെന്നാണ് പൊലീസ് ഭാഷ്യം. തന്‍റെയൊപ്പം കോളജില്‍ വരണമെന്നും മാര്‍ക്കിനെപ്പറ്റി അന്വേഷിക്കണമെന്നും ദിപാലി മകനെ നിര്‍ബന്ധിച്ചത്രേ. ഇതുമൂലമുണ്ടായ വൈരാഗ്യമാണ് ദിപാലിയെ കൊലപ്പെടുത്തുന്നതിലേക്ക് സിദ്ധാന്തിനെ നയിച്ചതെന്നാണ് വിവരം.
എന്നാല്‍ ഇതുമാത്രമല്ല, മറ്റ് ചില കാരണങ്ങളും കൊലപാതകത്തിനുണ്ട് എന്നാണ് പൊലീസ് തന്നെ നല്‍കുന്ന വിവരം. മാതാപിതാക്കള്‍ തമ്മില്‍ നിരന്തരം വഴക്കിടുന്നതില്‍ അങ്ങേയറ്റം നിരാശനും അസ്വസ്ഥനുമായിരുന്നു സിദ്ധാന്തെന്നും പൊലീസ് പറയുന്നു.
