മോഡിയുടെ റാലിയില്‍ പങ്കെടുക്കണമെങ്കില്‍ അഞ്ച് രൂപ ടിക്കറ്റ് എടുക്കണം
തിങ്കള്‍, 15 ജൂലൈ 2013 (18:51 IST)
PRO
നരേന്ദ്ര മോഡി പങ്കെടുക്കുന്ന റാലിയില്‍ പങ്കെടുക്കാന്‍ അഞ്ച് രൂപ ടിക്കറ്റ്. നരേന്ദ്ര മോഡി ഹൈദരാബാദില്‍ നടത്തുന്ന റാലിയില്‍ പ്രവേശിക്കണമെങ്കില്‍ അഞ്ച് രൂപ ടിക്കറ്റ് എടുക്കണമെന്നാണ് ബിജെപി പ്രവര്‍ത്തകര്‍ പറഞ്ഞത്. ഓഗസ്റ്റ് 11 നാണ് ഹൈദരാബാദിലെ മോഡിയുടെ റാലി.
മറ്റ് രാഷ്ട്രീയ പാര്‍ട്ടികള്‍ പണം കൊടുത്ത് അണികളെ സംഘടിപ്പിക്കുമ്പോള്‍ തങ്ങള്‍ ഇതിന് നേരെ വിപരീതമായി ടിക്കറ്റ് വച്ചാണ് റാലി സംഘടിപ്പിക്കുന്നതെന്നാണ് ബി ജെ പി വക്താക്കള്‍ വാദിക്കുന്നത്. മോഡിയുടെ വാക്കുകള്‍ നേരിട്ട് കേള്‍ക്കാന്‍ യുവാക്കള്‍ പണം കൊടുത്ത് വരട്ടെ എന്നാണ് ബിജെപി സംസ്ഥാന ജനറല്‍ സെക്രട്ടറി എന്‍വിഎസ്എസ് പ്രഭാകര്‍ പറഞ്ഞത്.
റാലിയില്‍ പതിനെട്ടിനും 40 നും ഇടയില്‍ പ്രായമുള്ളവര്‍ പങ്കെടുത്താല്‍ മതിയെന്നും നിര്‍ദ്ദേശമുണ്ട്. റാലിയില്‍ പങ്കെടുക്കുന്നവര്‍ക്കായി ഓണ്‍ലൈന്‍ രസ്‌ട്രേഷനും തുടങ്ങിയിട്ടുണ്ട്.
