ലോക്‌സഭാ തെരഞ്ഞെടുപ്പിൽ ആർക്കും തനിച്ചു ഭരിക്കാനുള്ള ഭൂരിപക്ഷമില്ലാതെ വന്നാൽ ബിജെപി വീണ്ടും സർക്കാരുണ്ടാക്കുന്നതു തടയാൻ പ്രതിപക്ഷ പാർട്ടികൾ മുൻകരുതൽ എടുക്കുന്നുവെന്ന സൂചനകൾ ശരിവച്ച് മുതിർന്ന കോൺഗ്രസ് നേതാവ് ഗുലാം നബി ആസാദ്. വെവ്വേറെയാണു മൽസരിച്ചതെങ്കിലും വിധി വരും മുൻപ് കോൺഗ്രസ് എല്ലാ മതേതരപ്പാർട്ടികളെയും ഒന്നിച്ചു നിർത്തുമെന്ന് ആസാദ് പറഞ്ഞു.
ഫലപ്രഖ്യാപനത്തിന് മുമ്പ് തന്നെ പ്രധാനമന്ത്രി സ്ഥാനാർത്ഥിയുണ്ടാവുന്നത് നല്ലതാണ്. എന്നാൽ അത് കോൺഗ്രസിന് തന്നെ കിട്ടണമെന്ന് ഒരു വാശിയുമില്ല – ഗുലാം നബി ആസാദ് പറഞ്ഞു. ”ലോക്‌സഭാ തെരഞ്ഞെടുപ്പിന്റെ അവസാനഘട്ടത്തിലാണ് നമ്മൾ. പ്രചാരണത്തിനിറങ്ങിയ എനിക്ക് മനസ്സിലായത് എൻഡിഎയോ ബിജെപിയോ അധികാരത്തിലെത്തില്ല എന്ന് തന്നെയാണ്. നരേന്ദ്രമോദി ഇനിയൊരു തവണ കൂടി പ്രധാനമന്ത്രിയാകില്ല. എൻഡിഎ ബിജെപി വിരുദ്ധ സർക്കാർ ഇനി അധികാരത്തിൽ വരും”, ആസാദ് പറഞ്ഞു.
