കഴിഞ്ഞ വെള്ളിയാഴ്ച ബൈക്കില്‍പോയ യുവാവിനെ വെടിവച്ചുകൊന്ന കേസുമായി ബന്ധപ്പെട്ട് സഹോദരങ്ങള്‍ പൊലീസ് പിടിയിലായി. പെരിന്തല്‍മണ്ണ മാട്ടറയ്ക്കല്‍ വെള്ളപ്പാറ എസ് വളവില്‍ വച്ച് പത്തിരി ജാഫര്‍ എന്നയാളെ വെടിവച്ചു കൊന്ന താഴേക്കാട് അരക്കുപറമ്പ് മാട്ടറയ്ക്കല്‍ സ്വദേശി നടക്കളത്തില്‍ വീട്ടില്‍ ആസിഫ് അലി (27), സഹോദരന്‍ അന്‍സാര്‍ അലി (27) എന്നിവരാണു പിടിയിലായത്.
വര്‍ഷങ്ങള്‍ക്ക് മുമ്പ് ജാഫര്‍ ആസിഫ് അലിയെ കുത്തി പരിക്കേല്‍പ്പിച്ചിരുന്നു. ഇതില്‍ ഏറെ നാള്‍ ചികിത്സയും വേണ്ടിവന്നിരുന്നു. കുത്തുകേസില്‍ തെളിവില്ലാത്തതിനാല്‍ ജാഫര്‍ക്ക് ശിക്ഷ ലഭിച്ചുമില്ല. ഇതായിരുന്നു കൊലപാതകത്തിനു കാരണം. ഡി.വൈ.എസ്.പി പി.എം.പ്രദീപ്, സി.ഐ കെ.എം.ബിജു എന്നിവരുടെ നേതൃത്വത്തിലുള്ള പൊലീസ് സംഘമാണു പ്രതികളെ വലയിലാക്കിയത്.
