പരാതിക്കാരിയായ യുവതിയുടെ ഫോണിലേക്ക് അശ്ലീല സന്ദേശം അയച്ച പോലീസുകാരനെതിരെ നടപടിയെടുത്തു. കോഴിക്കോട് പന്തീരങ്കാവ് ഗ്രേഡ് എസ്‌ഐ ഹരീഷ് ബാബുവിനെ സസ്‌പെന്‍ഡ് ചെയ്തു. കോഴിക്കോട് സിറ്റി പോലീസ് കമ്മീഷണര്‍ രാജ്പാല്‍ മീണയാണ് എസ്‌ഐക്കെതിരെ നടപടി സ്വീകരിച്ചത്. പരാതി അറിയിക്കുവാനായി ഫോണില്‍ ബന്ധപ്പെട്ടതായിരുന്നു. ഇതോടെ മൊബൈല്‍ നമ്പര്‍ മനസ്സിലാക്കിയ പോലീസ് ഉദ്യോഗസ്ഥന്‍ വാട്‌സ്ആപ്പിലേക്ക് അശ്ലീല വീഡിയോകളും അശ്ലീല സന്ദേശവും അയച്ചു എന്നതാണ് പരാതി.
അന്വേഷണത്തില്‍ നിന്ന് ലഭിച്ച വിവരങ്ങളുടെ അടിസ്ഥാനത്തില്‍ എസ് എച്ച്ഒ റിപ്പോര്‍ട്ട് സമര്‍പ്പിച്ചു. യുവതിയുടെ പരാതിയില്‍ കഴമ്പുണ്ടെന്ന് കണ്ടെത്തുകയും ചെയ്തു. ഈ റിപ്പോര്‍ട്ടിന്റെ അടിസ്ഥാനത്തിലാണ് ഗ്രേഡ് എസ്‌ഐ ഹരീഷ്ബാബുവിനെതിരെ സിറ്റി പൊലീസ് കമ്മീഷണര്‍ അച്ചടക്ക നടപടി സ്വീകരിച്ചത്. ഈ ഉദ്യോഗസ്ഥനെതിരെ നേരത്തെയും സമാനമായ പരാതികള്‍ ഉയര്‍ന്നിട്ടുണ്ട്.
