പിറവത്ത് അച്‌ഛനെയും മക്കളെയും മരിച്ച നിലയില്‍ കണ്ടെത്തി. പിറവം മുളംകുളം വടക്കേക്കര ബി പി സി കോളജിന് സമീപമുള്ള വീട്ടിലാണ് പിതാവിനെയും രണ്ടു മക്കളെയും മരിച്ച നിലയില്‍ കണ്ടെത്തിയത്. പെന്തക്കൊസ്ത് സഭയുടെ പാസ്റ്ററായ പാലച്ചുവട് വെള്ളാങ്കല്‍ റെജി (40), മക്കളായ അഭിനവ് (15), അല്‍ഫിയ റെജി (12) എന്നിവരെയാണ് മരിച്ച നിലയില്‍ കണ്ടെത്തിയത്.
മക്കളെ കൊലപ്പെടുത്തി റെജി ആത്മഹത്യ ചെയ്തതാണെന്നാണ് പൊലീസിന്റെ പ്രാഥമിക നിഗമനം. റെജിയും ഭാര്യ സന്ധ്യയും തമ്മില്‍ ഞായറാഴ്ച രാത്രി വഴക്കുണ്ടായിരുന്നു. വഴക്കിനെ തുടര്‍ന്നുണ്ടായ അടിപിടിയില്‍ സന്ധ്യ ബോധരഹിതയായി വീഴുകയായിരുന്നു. തുടര്‍ന്ന്, രാവിലെ എഴുന്നേറ്റു നോക്കുമ്പോള്‍ ആണ് സന്ധ്യ ഭര്‍ത്താവിനെയും മക്കളെയും മരിച്ച നിലയില്‍ കണ്ടത്.
