പഠിച്ച പണി പതിനെട്ടും പയറ്റിയാലും പുള്ളിപ്പുലിയുടെ പുള്ളി മാറുമോ ?; പിണറായിയെ പരിഹസിച്ച് കെ സുരേന്ദ്രന്‍

സിപിഎം പോളിറ്റ് ബ്യൂറോ അംഗം പിണറായി വിജയനെതിരെ ബിജെപി നേതാവ്‌ കെ സുരേന്ദ്രന്‍ ഫേസ്‌ബുക്കില്‍. പഠിച്ച പണി പതിനെട്ടും പയറ്റിയാലും പുള്ളിപ്പുലിയുടെ പുള്ളി മാറുമോ എന്നാണ് പിണറായിയോടുള്ള സുരേന്ദ്രന്റെ ചോദ്യം. വിഴിഞ്ഞം പദ്ധതിയില്‍ നിന്നും അദാനി ഗ്രൂപ്പിനെ മാറ്റില്ല എന്ന പിണറായിയുടെ പ്രസ്‌താവനയ്‌ക്കെതിരേയായിരുന്നു സുരേന്ദ്രന്റെ ഒളിയമ്പ്‌.

സുരേന്ദ്രന്റെ ഫേസ്‌ബുക് പോസ്റ്റിന്‍റെ പൂർണരൂപം:-

ഒരാൾ മുഖ്യമന്ത്രിയായപോലെ പെരുമാറാൻ തുടങ്ങിയിട്ടുണ്ട്. പ്രതിച്ഛായ മാറ്റാനുള്ള തന്ത്രമാണത്രെ. ഫേസ് ബുക്കിൽ പേജ് തുടങ്ങിക്കൊണ്ടായിരുന്നു തുടക്കം. പിന്നെ പലരെയും രഹസ്യമായിക്കണ്ട്‌ ചർച്ചകൾ. പാറമടമുതലാളിമാരും വിദ്യാഭ്യാസകച്ചവടക്കാരുമൊക്കെ വന്നുകണ്ട്‌ ചർച്ചകൾ നടത്തി, കൂട്ടത്തിൽ ചില മതതീവ്രവാദ സംഘടനാ നേതാക്കളും. ഇന്നിപ്പോൾ ചില കുടിവെള്ള പദ്ധതികളൊക്കെ സന്ദർശിച്ച് സ്ഥിതിഗതികൾ വിലയിരുത്തിയത്രേ.

വിഴിഞ്ഞം തുറമുഖ പദ്ധതി അദാനി ഏറ്റെടുത്തപ്പോൾ പറഞ്ഞത് അദാനി മോദിയുടെ ഇടപാടുകാരനാണെന്നും കോർപറേറ്റ് ഭീകരനാണെന്നും പദ്ധതികൊണ്ട് കേരളത്തിന്‌ പ്രയോജനമില്ലെന്നുമൊക്കെയായിരുന്നു. ഇപ്പോൾ പറയുന്നത് തങ്ങൾ അധികാരത്തിൽ വന്നാൽ അദാനി തന്നെ തുടരുമെന്നാണ്. വികസനത്തിന്‌ എതിരുനിൽക്കുന്നവർ സാമൂഹ്യ വിരുദ്ധരാണെന്ന് പ്രകൃതി സ്നേഹികളെ ഉദ്ദേശിച്ചുള്ള പ്രസ്താവനയും കണ്ടു. പഠിച്ച പണി പതിനെട്ടും പയറ്റിയാലും പുള്ളിപ്പുലിയുടെ പുള്ളി മാറുമോ?