ആലപ്പുഴ: ഏറെക്കാലത്തെ കാത്തിരിപ്പിന് ശേഷം യാഥാര്‍ഥ്യമായ ആലപ്പുഴ ബൈപ്പാസ് ഉദ്ഘാടനം കഴിഞ്ഞു കേവലം ഒരു മണിക്കൂറിനുള്ളില്‍ തന്നെ വാഹനാപകടത്തിനു സാക്ഷ്യം വഹിച്ചു. കഴിഞ്ഞ ദിവസം കേന്ദ്രമന്ത്രി നിതിന്‍ ഗഡ്കരിയും മുഖ്യമന്ത്രി പിണറായി വിജയനും ചേര്‍ന്ന് ഉദ്ഘാടനം നടത്തുന്നതിന് മുമ്പ് തന്നെ ബൈപ്പാസില്‍ വാഹനം ഓടിക്കാനായി വാഹനങ്ങളുടെ നീണ്ട നിര കാത്തുനിന്നിരുന്നു.
ഉദ്ഘാടനം കഴിഞ്ഞതോടെ മറ്റു വാഹനങ്ങള്‍ക്ക് ബൈപ്പാസില്‍ പ്രവേശിക്കാന്‍ അനുമതി നല്‍കി. എന്നാല്‍ വാഹന ഉടമകളുടെ അമിതമായ ആവേശമാണ് അപകടത്തിന് കാരണമായത്. തിക്കും തിരക്കും വര്‍ദ്ധിക്കുകയും തുടര്‍ന്ന് ഒരു ലോറിയും രണ്ട് കാറുകളും ഒന്നിന് പിറകെ ഒന്നായി കൂട്ടിയിടിക്കുകയായിരുന്നു. ഇതോടെ ഗതാഗതം ആകെ താറുമാറായി. ഇതിനിടെ ഒരു ബൈക്ക് പഞ്ചറായതും ഗതാഗതത്തെ വലച്ചു.
