ആ അമ്മക്ക് അത്രയേ ആയുസുണ്ടായിരുന്നുള്ളു, അത്രയേ ഭാഗ്യമുണ്ടായിരുന്നുള്ളു. അതല്ലെങ്കില്‍ പ്രസവം കഴിഞ്ഞ് മണിക്കൂറുകള്‍ക്കകം അവരെ മരണം വന്ന് മുട്ടി വിളിക്കില്ലായിരുന്നു. ആരുടെയൊക്കെയോ അശ്രദ്ധ ആ 25കാരിയുടെ ജീവനെടുത്തു. തെക്കന്‍ സ്പെയിനിലെ സെവിലിലെ വെര്‍ജിന്‍ ഡി വാല്‍മെ ആശുപത്രിയില്‍ കഴിഞ്ഞ ദിവസം നടന്ന സംഭവം ആരുടെയും കണ്ണു നനയിക്കുന്നതായിരുന്നു.
യുവതിയും നവജാതശിശുവും അടങ്ങുന്ന സ്ട്രെച്ചര്‍ ലിഫ്റ്റില്‍ കയറ്റിയെങ്കിലും ലിഫ്റ്റ് പൂര്‍ണമായും അടയും മുന്‍പേ ലിഫ്റ്റ് മുകളിലേക്ക് ഉയര്‍ന്നു. ഇതോടെ യുവതിയുടെ ശരീരം രണ്ടായി മുറിയുകയായിരുന്നു. ലിഫ്റ്റിന്റെ ലോഹഭാഗങ്ങളില്‍ തട്ടിയാണ് ശരീരം രണ്ടായി മുറിഞ്ഞത്. മരണവേദനയ്ക്കിടയിലും തന്റെ കൈക്കുള്ളില്‍ പൊന്നോമനെ പൊതിഞ്ഞു സുരക്ഷിതയായി പിടിച്ചിട്ടുണ്ടായിരുന്നു റോസിയോ.
