സംസ്ഥാനത്തിന്‍റെ വിവിധ ആവശ്യങ്ങള്‍ ഉന്നയിച്ച് കേരളത്തിലെ എം പി മാര്‍ മന്ത്രി എം വിജയകുമാറിന്റെ നേതൃത്വത്തില്‍ റെയില്‍വേമന്ത്രി ലാലുപ്രസാദ് യാദവിനെ ഇന്നു കാണും. കേരളം ആസ്ഥാനമായി റെയില്‍വേ സോണ്‍ വേണമെന്ന് സംഘം മന്ത്രിയോട് ആവശ്യപ്പെടും.
കൂടാതെ, കേരളത്തിന്‍റെ മറ്റ് റെയില്‍വേ സംബന്ധമായ ആവശ്യങ്ങളും മന്ത്രിയെ അറിയിക്കുമെന്നാണ് പ്രതീക്ഷ. കഴിഞ്ഞ വെള്ളിയാഴ്ച സംസ്ഥാനത്തെ റയില്‍വേയുടെ ചുമതലയുളള മന്ത്രി എം വിജയകുമാറിന്റെ നേതൃത്വത്തില്‍ ചേര്‍ന്ന യോഗം ഇതു സംബന്ധിച്ച് തീരുമാനമെടുത്തിരുന്നു.
സംസ്ഥാനത്തേക്കു കൂടുതല്‍ ട്രെയിന്‍ സര്‍വ്വീസുകള്‍ തുടങ്ങുക, നിലവിലുളള സര്‍വ്വീസുകളുടെ എണ്ണം വര്‍ധിപ്പിക്കുക തുടങ്ങിയ കാര്യങ്ങളും ഇന്ന് ഉന്നയിക്കും. മംഗലാപുരം മുതല്‍ കന്യാകുമാരി വരെയുളള ലൈന്‍ ഇരട്ടിപ്പിക്കുകയും വൈദ്യുതികരിക്കുകയും ചെയ്യുന്ന പദ്ധതി ഉടന്‍ പൂര്‍ത്തിയാക്കണമെന്നും കേന്ദ്രത്തോട് ആവശ്യപ്പെട്ടേക്കും.
അതേസമയം, 29 എം പി മാര്‍ ഉള്ള സംസ്ഥാനത്ത് വെള്ളിയാഴ്ച യോഗത്തില്‍ പങ്കെടുക്കാന്‍ എത്തിയത് വെറും ആറു പേരായിരുന്നു. പി ജെ കുര്യന്‍, സെബാസ്‌റ്റ്യന്‍ പോള്‍, വര്‍ക്കല രാധാകൃഷ്‌ണന്‍, എ പി അബ്‌ദ്ദുള്ളക്കുട്ടി, തെന്നല ബാലകൃഷ്‌ണപിള്ള, പി സി തോമസ്‌ എന്നിവരാണ്‌ വെള്ളിയാഴ്ച സര്‍ക്കാര്‍ വിളിച്ചുചേര്‍ത്ത സുപ്രധാനയോഗത്തില്‍ പങ്കെടുത്തിരുന്നത്‌.
