തിരുവനന്തപുരം: സി പി എം സംസ്ഥാന സെക്രട്ടറി പിണറായി വിജയന്‍ നയിക്കുന്ന നവകേരളയാത്രയ്ക്ക് ഇന്ന് സമാപനം. ഇന്ന് വൈകിട്ട് ശംഖുമുഖത്താണ് സമാപനസമ്മേളനം. വൈകുന്നേരം ആറരയ്ക്ക്‌ ദേശീയ ജനറല്‍ സെക്രട്ടറി പ്രകാശ് കാരാട്ടാണ് സമ്മേളനം ഉദ്ഘാടനം ചെയ്യുന്നത്. മുഖ്യമന്ത്രി വി എസ് അച്യുതാനന്ദന്‍ സമാപന സമ്മേളനത്തില്‍ പങ്കെടുക്കില്ല എന്ന് ഏകദേശം ഉറപ്പായിട്ടുണ്ട്. കേന്ദ്ര സംസ്ഥാന നേതാക്കള്‍ സമ്മേളനത്തില്‍ പങ്കെടുക്കും.
സമാപന സമ്മേളനത്തിന് മുന്നോടിയായി ഗംഭീര ഒരുക്കങ്ങളാണ് നടത്തിയിട്ടുള്ളത്. പരിപാടി നടക്കുന്ന വേദിക്ക് കിലോമീറ്ററുകള്‍ക്കപ്പുറത്ത് മുതല്‍ തന്നെ കൊടിതോരണങ്ങള്‍ കൊണ്ട് അലങ്കാരങ്ങള്‍ നടത്തിയിട്ടുണ്ട്. നഗരവീഥികള്‍ പൂര്‍ണ്ണമായും ചുവന്നു കഴിഞ്ഞു.
വൈകിട്ട് റെഡ് വളണ്ടിയര്‍ മാര്‍ച്ചോടെയാണ് പരിപാടി ആരംഭിക്കുക. പതിനായിരക്കണക്കിന് പാര്‍ട്ടി പ്രവര്‍ത്തകര്‍ സമാപന സമ്മേളനത്തിനെത്തും. ഇതോടെ ശംഖുമുഖം തീരം ചെങ്കടലാകും.
സമ്മേളനം കണക്കിലെടുത്ത്‌ നഗരത്തില്‍ ഗതാഗത നിയന്ത്രണമേര്‍പ്പെടുത്തിയിട്ടുണ്ട്. ശംഖുമുഖം മുതല്‍ എയര്‍പോര്‍ട്ട്‌ വരെയുള്ള ഭാഗത്ത്‌ ഉച്ച തിരിഞ്ഞ്‌ ഗതാഗതം നിരോധിച്ചിട്ടുണ്ട്‌.
