വീണ്ടുമൊരു കേരളപ്പിറവി ദിനം. മഹത്തായ ഒരു സംസ്കൃതിയുടെയും സംസ്ഥാനത്തിന്റെയും പിറന്നാളാണ് ഇന്ന്. ഒപ്പം തന്നെ, ഇന്റര്‍നെറ്റ് ലോകത്ത് ചരിത്രം സൃഷ്ടിച്ച ഭാഷാപോര്‍ട്ടല്‍, മലയാളം വെബ്‌ദുനിയയുടെ പിറന്നാള്‍ ദിനം കൂടിയാണ് നവംബര് ഒന്ന്. ഇന്ന് മലയാളത്തിലെ ആദ്യ സമഗ്ര ഭാഷാ പോര്‍ട്ടലായ മലയാളം വെബ്ദുനിയ വിജയകരമായി പതിനാറ്‌ വര്‍ഷം പൂര്‍ത്തിയാക്കി പതിനേഴാം വര്‍ഷത്തിലേക്ക് കടക്കുന്നു.
2000ലെ കേരളപ്പിറവി ദിനത്തിലാണ് വെബ്ദുനിയ ഡോട്ട് കോമിന്‍റെ മലയാളം എഡിഷനായി മലയാളം വെബ്ദുനിയ പിറന്നത്. അന്ന് ‘വെബ്‌ലോകം ഡോട്ട് കോം’ എന്ന പേരിലുള്ള ഭാഷാ പോര്‍ട്ടലായിരുന്നു. എന്നാല്‍, 2007 ജൂലൈ മുതല്‍ വെബ്‌ലോകം വെബ്ദുനിയ കുടുംബത്തിലെ മറ്റ് എട്ട് ഭാഷാ പോര്‍ട്ടലുകള്‍ക്കൊപ്പം യൂണിക്കോഡ് രൂപമാറ്റം സ്വീകരിച്ച് മലയാളം ഡോട്ട് വെബ്ദുനിയ ഡോട്ട് കോം എന്ന പേര് സ്വീകരിച്ചു.
മലയാളം വെബ്ദുനിയ ലോകത്തിലെ ഏറ്റവും മികച്ച മലയാളം പോര്‍ട്ടലായി മാറിക്കഴിഞ്ഞു. പില്‍ക്കാലത്ത് വന്‍‌കിട പത്രങ്ങളുടെ ഓണ്‍ലൈന്‍ എഡിഷനുകള്‍ പോര്‍ട്ടലുകളായി മാറി ആധിപത്യം ഉറപ്പിച്ചപ്പോഴും ലോകമെമ്പാടുമുള്ള മലയാളികള്‍ വെബ്‌ദുനിയയുടെ മലയാളം പോര്‍ട്ടലിനെ കൈവിട്ടില്ല. വെബ് താളുകള്‍ക്ക് കാലാനുസൃത മാറ്റം വരുത്തുന്നതില്‍ ഞങ്ങള്‍ എന്നും മുന്‍‌പന്തിയില്‍ തന്നെയാണ്.
