വഴിയാത്രക്കാരനെ ആക്രമിച്ച കാട്ടുപന്നി ഫ്ലാറ്റിലേക്ക് ഓടി കയറിയത് ഏറേ നേരം പരിഭ്രാന്തി പരത്തി. തൃശൂര്‍ കോണ്ടോഴിയിലെ ആശിര്‍വാദ് ഫ്ലാറ്റിലാണ് പന്നി ഓടിക്കയറിയത്. റോഡിലൂടെ പോകുകയായിരുന്ന വഴിയാത്രക്കാരന്‍ കാട്ടുപന്നിയെ ഭയന്ന് ഫ്ലാറ്റിലേക്ക് ഓടിക്കയറുകയായിരുന്നു. പിന്നാലെ എത്തിയ പന്നി ഫ്ലാറ്റിന്റെ ടെറസിലേക്ക് ഓടി കയറി.
തുടര്‍ന്ന് മുളവടി എടുത്ത്‌ കുത്തിയപ്പോള്‍ പന്നി അടുത്ത നിലയിലെ ബാല്‍ക്കണിയിലേക്ക്‌ ചാടി. ഓടിക്കൂടിയ ആളുകള്‍ ഷട്ടറുകള്‍ അടച്ചപ്പോള്‍ പുറത്തുകടക്കാനാകാതെ കുടുങ്ങിയ പന്നി പരാക്രമം കാട്ടാന്‍ തുടങ്ങി. ഒടുവില്‍ പന്നി ഇരുപതടി താഴ്ചയിലേക്ക് ചാടി രക്ഷപ്പെടുകയായിരുന്നു.
സമീപത്തെ പറമ്പുകളിലൂടെ ഓടി പന്നി രക്ഷപ്പെട്ടു. ഇതിനിടെ മറ്റൊരു പന്നി എതിര്‍ദിശയിലേക്ക്‌ ഓടിപ്പോകുന്നതും കണ്ടു. രാത്രി കൂട്ടത്തോടെ കാട്ടുപന്നികള്‍ നാട്ടില്‍പുറത്തേക്കിറങ്ങാറുണ്ടെങ്കിലും പകല്‍ സാധാരണ കാണാറില്ല.
