പണക്കൊഴുപ്പില്‍ മയങ്ങി മുഖ്യമന്ത്രി, തോമസ് ചാണ്ടിയെ പുറത്താക്കണം - പിണറായിക്കെതിരെ ആഞ്ഞടിച്ച് കുമ്മനം

ഗതാഗത മന്ത്രി തോമസ് ചാണ്ടിയെകൊണ്ട് മന്ത്രിസ്ഥാനം രാജിവെപ്പിക്കാന്‍ മുഖ്യമന്ത്രി പിണറായി വിജയന്‍ തയ്യാറാകണമെന്ന് ബിജെപി സംസ്ഥാന അധ്യക്ഷന്‍ കുമ്മനം രാജശേഖരന്‍. കയ്യേറ്റക്കാര്‍ക്കെതിരെ കര്‍ശന നടപടി സ്വീകരിക്കുമെന്ന മുഖ്യമന്ത്രിയുടെ നിലപാടിനേറ്റ കളങ്കമാണ് തോമസ് ചാണ്ടിയെന്നും കുമ്മനം ആരോപിച്ചു.

ധാര്‍മികതയുടെ പേര്‍ല്‍ ഇപി ജയരാജനെയും ശശീന്ദ്രനെയും രാജിവെപ്പിച്ച മുഖ്യമന്ത്രി ഈ നിലപാട് തോമസ് ചാണ്ടിയോട് മാത്രം സ്വീകരിക്കാത്തതിന് കാരണമുണ്ടെന്നും അദ്ദേഹത്തിന്റെ പണക്കൊഴുപ്പില്‍ മയങ്ങിയിരിക്കുകയാണ് മുഖ്യമന്ത്രിയെന്നും കുമ്മനം ആരോപിച്ചു. രോപണം നിലനില്‍ക്കുമ്പോള്‍ തന്നെ മുഖ്യമന്ത്രി കുടുംബസമേതം തോമസ് ചാണ്ടിയുടെ ആതിഥ്യം സ്വീകരിച്ചത് ഒഴിവാക്കണമായിരുന്നുവെന്നും അദ്ദേഹം പറഞ്ഞു

തോമസ് ചാണ്ടിയുടെ സാമ്പത്തിക ശക്തിക്ക് മുന്നില്‍ ഇടത് - വലത് നേതാക്കള്‍ പഞ്ചപുച്ഛമടക്കി നില്‍ക്കുന്ന ദയനീയ കാഴ്ചയാണ് കേരളത്തിലുള്ളതെന്നും സാധാരണ ജനങ്ങളോട് അല്‍പ്പമെങ്കിലും പ്രതിബദ്ധതയുണ്ടെങ്കില്‍ തോമസ് ചാണ്ടിയെ രാജിവെപ്പിക്കാന്‍ മുഖ്യമന്ത്രി തയ്യാറാകണമെന്നും അദ്ദേഹം ആവശ്യപ്പെട്ടു.